الجواز مشروع سئ السمعة

مساء الخير استاذة نيفين يارب تكوني بخير ,

أنا قرأت المشكلة اللي تحت عنوان " رغبة مشروعة " ولية تعليق على فكرة التقاليد والأعراف الشرقية اسمحيلي انشرها .. انا شايفة إن معظم الأعراف اللي مجتمعنا خانق نفسه بيها بعيدا عن المحرمات طبعا كانت أهم أسباب في تأخير الزواج .. مجتمع بحالة مصر على تقاليد ملهاش معنى زي المغالاه في الزواج وزي مواصفات الشخص نفسه المتقدم للزواج ومش فاهمة برضه كلمة ابن ناس مفهومها ايه ؟ للأسف مفهومها انه يكون شاب متعلم في الجامعة الفولانية أم ٤٠ و٧٠ الف في السنة وبيلبس كويس وبيتكلم لغات  وراكب عربية كويسة وبعد الجواز نكتشف المصايب والأخلاق المنحرفة والسلوكيات اللي مفيهاش اي رباية .. انا بسمع مشاكل كتير من الأصدقاء أو الأقارب عن الزيجات اللي فشلت لقيت ان معظمها بيشتكي من عدم التوافق وعدم التفاهم وان كل طرف فيهم بعيد بطباعه كل البعد عن شريك حياته .. الناس دي برضه إختارت على أسس الشخصية المناسبة من وجهة نظر الأهل .. فكرة أو أكذوبة الشخصية المناسبة .. هية مناسبة لمين ؟ للأهل ولا للبنت اللي هتتجوز ؟ .. طبعا مناسبة بمقاييس الأهل .. من هنا بتبدأ المشاكل والجواز بقى مشروع سيئ السمعة بسبب المشاكل اللي بتخرب البيوت والسبب فيها الأعراف والماديات والرأي المغلوط وحاجة مهزلة .. لما مجتمع يتفشى فيه عدم الإقبال على الزواج دي مصيبة كبيرة لانها في النهاية حاجة ضد الطبيعة وبيكون السبب في أمراض نفسية كتيرة ومنها لأمراض عضوية طبعا .. هية دايرة مغلقة وكل غير المتزوجين بيدوروا فيها .. وطبيعي جدا اللي متجوز مش مرتاح لانه إتجوز بنفس مقاييس العرف والعادات ونسي إنه إنسان ومن حقه يدقق في الإختيار والتوافق النفسي والإجتماعي وغيره وغيره .. واللي مش متجوز وبيدعي انه مستمتع بالحرية بيجي آخر اليوم يبات في وحدة ويبدأ مع مرور الوقت يشتكي من حاجات كتير كلها بسبب انه وحيد , في رأي أن البني آدمين من الأهالي يرحمونا بقى شوية من الإعتراضات على كل حاجة واي حاجة .. الجواز دة ألفة .. رحمة .. كاريزما .. شغف .. حب .. للإنسان اللي المفروض انه هيبقى شريك حياتي .. ارحمونا بقى من شبكة بكذا وشقة لازم تكون تمليك وشغل في المكان الفلاني .. انا لو مش عايشة سعيدة مع راجل أتفق معاه الشقة مش هتنفعني ولا الشبكة هتفرحني ولا شغله الشيك هيطبطب علية بالليل وأنا بعيط ومحروق دمي .. يا أهالي الشرق أرجوكم إفهموا .. العيشة مش أخيرا جه لبنتي عريس ولا أخيرا ابني اقتنع انه يتجوز .. الأهم هو نوع الشخص نفسه وطبيعته ودرجة فهمه للإنسانه اللي قدامه والعكس .. يارب رسالتي تؤثر في أفكار انتحرت من زمان .. شكرا أستاذة نيفين وآسفة على الإطالة .

مها المصري