كلمة تحييني

مشكلتي في جوزي مش بسمع منه كلمة حلوة انا معترفة انه زوج ممتاز لكن هوة مش بيعرف يعبر عن مشاعره نهائي وانا ببقى محتاجة اسمع منه دة .. سكوته او عدم تعبيره ساعات بحس بسببه ان فيه حاجز بيني وبينه وانا في اسرتي تمي ولبوية واخواتي متعودين نعبر عن مشاعرنا دايما بكلمة تلطف الجو وتحسس الواحد بالحنية والود والحميمية .. علشان كدة مستغربة من جوزي … اعمل ايه ؟

سهى

فضفضة

محررة الصفحة .. نيفين حجازي

هوة لو مشكلة جوزك الوحيدة انه مش بيعبرلك عن مشاعره بكلام دة يبقى إنجاز والله , لكن دة مش معناه اني معاكي في ان الكلمة الحلوة تهد جبال وتصلح الحال وتهون الحياة .. لكن زي ما انتي وأسرتك بتعبروا عن الحب والود بكلمات فيه ناس مش بتعرف تعمل دة وأحيانا بيتكسفوا من التعبير بكلام حلو .. نصيحتي ليكي بدل ما تاخدي موقف عدائي او تلومي كتير .. خليكي محتفظة بطريقتك بالتعبير عن مشاعرك بكلمات جميلة تجاه زوجك مرة بعد مرة هوة هيبدأ يحس بمفعول الكلام الجميل وهيبدأ يستجيب بس إديله فرصته في الوقت .. وهزري معاه كتير ومفيش مانع وهوة بيعبر بالفعل في موقف معين انتي اللي تبادري بكلمات حنونة بس بلاش تحسسيه ان الدنيا واقفة على كلمة حب لانه هيبقى حذر أكتر لانه واضح انه من النوع اللي بيخجل من فكرة التعبير عموما وبيكتفي بالأفعال .. دة مش وحش على فكرة .. لكن دي طبائع وطبيعي جدا اننا نكون مختلفين .. جربي وطولي بالك .