جوايا خناقة بسببها
السلام عليكم ,
أستاذة نيفين أنا إتعقدت خلاص .. كنت بحب بنت بجنون وخلاص بنتفق على الجواز وفجأة لقيتها بتبعد بحجج مش منطقية ابدا وآخرة المصيبة إكتشفت أنها خانتني مع شخص تاني .. وبسبب حبي ليها دة انا اتنازلت عن اقامتي في شارم الشيخ بالرغم من اني كنت ناجح في شغلي هناك ودخلي ممتاز وخسرت شغلي ورجعت القاهرة علشانها وانا دلوقتي متبهدل في شغلي هنا دة غير اني أجري فيه أقل من شارم بكتير وبعمل محاولات جامدة علشان أستعيد شغلي هناك مرة تانية وربنا يكرم لكن إحساسي بأنها السبب في خسارة شغلي مخليني أغلي منها وياريتها كانت تستاهل التضحية دي انا مش عارف اعمل ايه في الخناقة اللي دايرة جوايا بسببها .. هية غارت في داهية خلاص لكن المشكلة في ان احساسي الوحش جدا تجاهها ملازمني وبتعذب بيه .. اعمل ايه ؟
شريف
فضفضة
محررة الصفحة .. نيفين حجازي
مفيش اي مشكلة خالص على فكرة .. في النهاية أقدر أقولك إن اللي حصل في شغلك مش أكتر من تدابير من ربنا وأكيد هتبقى في صالحك صدقني .. حتى لو كان اللي يبدو منها غير كدة .. وبما أنك نجوت من علاقة كان ممكن تتورط فيها فكر بإيجابية وسيبك من التعامل بمنطق الفعل الماضي .. انت دلوقتي في الحاضر والحاضر دة يستجب مجهود وصفاء ذهن وتصفية كل المشاعر السلبية .. خد بالك .. التفكير بسلبية بتجيب لصاحبها أحداث سلبية والعكس .. ما عليك دلوقتي إنك تعمل إخلاء لأحداث جوة راسك .. إطرد من دماغك كل حاجة وأي حد عاملين جواك مشكلة لان الحاجات دي بتعطل كتير وما أعتقدش إنك هتسمح بالعطلة دي ولا ايه ؟ .. إجري ورا إستعادة شغلك في شارم مرة تانية وخلي دة هدفك الوحيد في الفترة اللي جاية كلها وهتيجي معاك ان شاء الله صدقني .. بتمنالك كل الخير وياريت تبعتلي تاني وتقوللي انك خلاص قدرت على أفكارك السلبية وإتغلبت عليها وإنك بتكتب رسالتك من شارم الشيخ .. ربنا معاك .. كل شئ بقدر ما تنساش الكلمة دي .
