رسالة مفتوحة لعصام الأمير
فين كلامك عن تطوير القنوات الإقليمية ولا خلاص بعد جلوسك بحكم المنصب بجوار الرئيس مش عايز حاجة من الدنيا؟!
السيد المسئول الأول عن منظومة الإعلام بالمصادفة وبالكادر الوظيفى عصام الأمير الذى طالبته بالرد العدد قبل الماضى كالعادة المصرية العتيقة أذن من طين وأسلوب سيب الجرايد تقول اللى هى عايزاه، ما الذى نفذته من كلامك الكبير عن تطوير منظومة الإعلام والقنوات الإقليمية، وأسألك ما الذى تقدمه أصلاً القنوات الإقليمية للناس؟ وتخدم من؟ أجيب عنك بالنيابة هى لا تخدم سوى الموظفين سواء مذيعات ومذيعين ومخرجين ومعدين أكل عيش يقلبوه وفى النهاية الدولة هى التى تتكبد ملايين الجنيهات إنفاق مرتبات وخلافه عليهم، هل المواطن فى الإسكندرية أو مطروح يستفيد أو حتى يشاهد شيئاً من الذى يتم تقديمه أم أنه يشاهد القنوات الفضائية؟ هل تعبر هذه البرامج بطاقمها عن مشاكله وتعبر عنها؟.
أجيب مليون لا، هى تعبر عن مصلحة شخصية وعلاقات اجتماعية للمقدم والمعد مع مسئول المحافظة والدليل يا سيد عصام عندما كانت الإسكندرية على سبيل المثال غارقة فى شبر ميه والناس ساخطة على المحافظ السابق طارق المهدى وكل الفضائيات كانت تنقل مشاكلهم ونبضهم كانت الأخت المذيعة المعجزة بتليفزيون الإسكندرية تقول إيه الكلام الهدام ده والراجل شغال والإسكندرية فل الفل وتمام التمام ده يا سيدى لأن مصلحتها مع المهدى الذى فوض لها ولرجل الأعمال رئيس لجنة تنمية الإسكندرية صلاحياته تبقى المصالح غالبة، ولأنك يا سيد عصام لن تتحرك لأنك صديق لهم بحكم لما كنت رئيس القناة الخامسة وكانوا ومازالوا أصدقاءك وصديقاتك واللى يقولوه لك هو الصح لأنك عايز كده فسيستمر الوضع كما هو عليه من الهدر وتقليب العيش والمصالح والضيوف الذين يظهرون مقابل ما يدفعون والدليل اليومين دول مرشحى الشعب والمحليات اللى عايز يتلمع يدفع وفيه سمسار وفيه كل حاجة.
يا سيد عصام القناة الخامسة منظومة خارج الإعلام المصرى دولة مستقلة تديرها أشياء كثيرة وأنت عارف أم أن فتح هذا الملف ليس من أولوياتك؟ هو إنت عايز إيه تانى من الدنيا بعد ما جلست بحكم المنصب بجوار الرئيس السيسى كل شيء بعد ده مالوش لزمة لكن نسيت إن الكرسى مالوش أمان، وأخيراً هو ليه شرط عدم ظهور مذيعات الوزن الثقيل لا ينطبق على مذيعات القناة دى وهن أرطال مثلما طبقته مثلاً على يمنى حسن بالقناة الأولى وغيرها؟ مش قلت لك القناة دى دولة داخل دولة الإعلام، تقدر تسأل المذيعة المعجزة عن زيارات مرسى مطروح، طبعاً الإجابة للتغطية لأن القناة بتغطى الإسكندرية والبحيرة ومطروح، طب اشمعنى فى وجود المحافظ الجديد والأخين «بسة والخمس»، آه يا بلد.
