أكرم حسنى يقدم دليل "أبوحفيظة" للتعامل مع زيادة الأسعار

أكد الإعلامى الساخر أكرم حسنى "أبوحفيظة" قائلا: "لابد من التعامل بحكمة مع الراتب الشهرى، يعنى كل واحد يجيب برجل ومنقلة ومسطرة حرف تى عشان توزع المرتب، وفى النهاية هتكتشف إن النتيجة إما يذودوا المرتب او يقللو الشهر".


وقدم خلال برنامج "أسعد الله مساءكم من جديد" على قناة mbc مصر دليل أبوحفيظة للتعامل مع زيادة الأسعار قائلا:


"تتعامل مع المرتب بحكمة تقسمة على تلات إتلات، تلت للأكل والشرب والمواصلات، وتلت لمراتك عشان متزعلش، والتلث الآخير لمراتك برضة عشان إنت متزعلش".


وأضاف: "إصرف ما فى الجيب يأتيك ما فى الغيب، أجيب حاجة وأنا جاى، كل الجمل دى تمسحها من مخك تماما، وكلمة أبوك اللى حفظها لك بأنك أوعى تدخل على حد وإيدك فاضية إنساها آن الآوان تعصى أبوك، إنت تدخل وإيدك فاضية ولو عرفت تنزل إيدك مليانه يكون أحسن".


وأكمل قائلا: "فاكر لما كنت بتتريق على الناس اللى بتاكل الكشرى بالعيش إعتذر لهم عشان كمان شوية كلنا هناكل العيش بالعيش".


وأستكمل حديثه قائلا: "لو إنت من النوع اللى بتاكل ولو مرفه بعد الأكل تحلى، لو إنت من الفصيلة النادرة دى، تعود نفسك على السادة بسبوبة سادة كنافة سادة، المكسرات متدخلش البيت غير لو هدية جت لك وفى رمضان، أما قصة إنك تاكل فرخة مع ولادك دة غلط هى بس تكون فى وسط السفرة منظر، وإديهم شوربة واللى يقرب على الفرخة زود له الشوربة".


وتابع قائلا: "تكنيك التعامل مع العزومات لازم يتغير، نتعامل معاه زى الفرجة على الفيلم الثقافى، وبمناسبة العزومات داخلين على رمضان وفرع محل العصير اللى بيتفتح فى بيتكم يتنسى هو بجنية تمر على سوبيا وتفتح الكيس وكل عيل ياخد شفطة يكسر صيامه".


وأوضح قائلا: "فى حاجات مراتك محتاجها إديها ثقتك، لكن اوعى تديها الكريدت كارت وهى رايحة المول، وبالمناسبة المولات معمولة عشان نتمشى فى التكيف مش عشان نشترى، وبالنسبة للمحلات المكتوب عليهاالآن آخيرا فى مصر أوعى تقرب عندها لإنها محلات غالية او إختار جروب وإمشى وسطة وهما داخلين المحل دة، هتلاقى مرشد بيديك نبذة عن كل حاجة وبعد كدة بتقفوا عند الباب تسقفوا وتمشوا".