عالم الرجال المزور
مساء الخير استاذة نيفين ببعت لحضرتك انهاردة بدافع التوعية للناس فقط لا غير ,
طول عمري بحاول أكون إنسانة ملتزمة قدر المستطاع في سلوكي وأخلاقي وعلاقتي بربنا , انا ما صغيرة دلوقتي انا في آخر العشرين وإتعرضت لكذا علاقة كان سبب قبولي ليها هية الزواج على سنة الله ورسوله لكن للأسف كل الجالة اللي قابلتهم لغاية دلوقتي مش داخلين علاقة حقيقية بمعنى : يا إما عايز يتسلى يا أما محتاج رفيقة خروجات ومسخرة يا إما عايز شريكة سرير فقط يا إما عايز واجهة يتعايق بيها قدام المجتمع اللي هوة موجود فيه وغيره كتير من إحتياجات الرجالة اللي كلها مرفوضة بالنسبة لواحدة عندها شئ من المبادئ أو كرامة .. اتعرضا الفترة الطويلة اللي فاتت لكم غريب جدا من المحاولات لإقناعي بفكرة " المرافقة " وللأسف الفكرة تم إقتراحها من أقرب الأصدقاء على إعتبار ان " المرافقة " شئ عادي ونصحوني بإني مش هلاقي راجل بمواصفات او راجل أفصله عند الترزي .. انا لا عايزة دة ولا دة .. كل ذنبي إني محتاجة شريك للحياة بما يرضي الله , الغريب كمان ان فيه ستات موافقة على المبدأ دة " المرافقة " واني اكتشفت ان الموضوع بقى ظاهرة في عالم الرجال المزور والنساء كمان .. المفروض انهاردة اني اقبل الأفلام الي الرجالة بتعملها علية واقبل بدافع ان العلاقات دي بقت عادية ؟؟؟؟ ولا اعمل ايه ؟ .. محدش متخيل قد ايه كل راجل بقابله بيخطط علشان يوصل لنفس النتيجة وهية " الرفق " .. هل بقت كدة خلاص ؟ .. بنصح البنات وحتى الستات اللي عندهم ظروف تدفعهم للجري ورا زواج تاني انهم يركزوا شوية في الكلام اللي بيتقال لهم من اي راجل داخل يهزر لأن في وسط الكلام المعسول أوي دة كذا فخ من السهل تقع فيه من كتر إحتياجها لراجل يشاركها الحياة .
انا قابلت كتير والغريب ان حتى الرجالة اللي جولي عن طريق أهل أو أصدقاء ما راعوش ان فيه كبار في الموضوع وانتهى الأمر بنفس العرض وهوة " الرفق " المقنع والحجج عندهم كتيرة جدا جدا ومتنوعة والمصيبة انها كتير بتبقى حجج منطقية ومقنعة زي مثلا انه لسة متعرض لأزمة في شغله ومحتاج وقت يلم نفسه ماليا .. أو انه زوج لست تانية وبينهم خلاف وهوة مضطر يفضل معاها علشان ابنه او بنته وغيرها من الحجج اللي كلها بتوصل الست لمنطقة الإنتظار بلا هدف في الحقيقة ومع الوقت تتعود عليه وبيقدر يقنعها انهم يعملوا علاقة غير شرعية بدافع الحب وبدافع ان دة عادي جدا بين الناس دلوقتي .
ما بقتش فاهمة هوة حصل ايه للرجالة .. ليه مفيش ضمير وليه مفيش خوف من حاجة زي كدة ممكن وبسهولة تتردله في اقرب الناس ليه !! .. عموما انا عندي كلام كتير جدا في الموضوع دة لكن مش عايزة أطول عليكم وانا كل مدة لو قابلتني فكرة للنصيحة مش هبخل بيها على الناس للتذكرة والعبرة .. شكرا أستاذة نيفين انك سمحتيلي بنشر رسالتي ولعلها تكون وقفة لستات وبنات كتير علشان يعيدوا حساباتهم مع الرجالة اللي مرتبطين بيهم وانا متأكدة ان مفيش بيت يخلوا من قصة وهمية زي دي .
منال
