تجربة الساحل "الشمال"
كنت في الساحل من ايام وقضيت مع عيلتي اسبوعين , لقيت مظاهر غريبة جدا وملهاش عندي غير معنى واحد هوة ان معظم الناس عايشين حالة من الكدب كبيرة وان المظاهر واخدة حدها بشكل مبالغ فيه .. اللبس وطريقة الكلام والسلوك العام .. كله كله مبالغ فيه .. لاحظت ان الناس رايحة للمنظرة حبة "وللشقط" حبة تانية واسفة على التعبير .. في أماكن معينة للسهر شفت انتشار المخدرات وشرب الخمور بقوا زي المية والهوا في انحاء الساحل الشمالي اللي المفروض انه بيضم ارقى فئات المصريين .. لكن جوة تجربة زيارتي للساحل ملقيتش غير إنحلال وعربدة وانعدام الحد الأدني من الخلق .. مش كل الناس علشان مابقاش بظلم الكل .. لكن كتير منهم كدة وخصوصا الشباب والبنات في سن صغير , انا متفاجأة من كم الإنحرافات وكم العقد اللي الناس بتمارسها على بعض والسؤال هنا .. همة رايحين يغيروا جو ويستجموا من اعباء شغل طول السنة ولا رايحين يعاكسوا ويتعاكسوا ويشربوا ويتمرمغوا في الوحل ؟ .. فيه اماكن بعينها هناك خصوصا للسهر لقيت فيها كل أنواع " الشمال " وكلمة شمال دي للأسف هي لغة الشباب اليومين دول .. يعني كل ما هو غلط .. الشمال هناك وصل لأقصى حد وبقى عادي واللي يطلع برة نطاق الشمال يبقى " ياي " .. ايه القرف دة ؟!! .. الغريب كمان اني بلاقي على البلاجات شمسية ستاتها منقبين ونازلين بهدومهم والشمسية اللي جنبها البيكيني .. شمسية اصحابها ماسكين كانزات البيرة واللي جنبها سبحة .. ايه التفاوت دة ؟ انا بجد مش فاهمة وياريت حد من اصدقاء فضفضة يشرحلي هوة ليه الفروق بقت متناقضة قوي كدة وازاي ؟ وشكرا للجميع .
مروة
