إمرأة لا تعرف الأنوثة
. السلام عليكم جميعا لعلكم بخير في الأيام الحر دي
أستاذة نيفين يارب تكوني بخير حابب رسالتي تتنشر يمكن يمكن يمكن الاقي حل جوة
المشكلة بإختصار .. أنا متجوز من ۸ سنوات ومن أول شهر في الزواج مراتي
مصرة على خروج أخبارنا الخاصة لوالدتها .. سيبك من دي هنقول بتفضفض ..
طيب ينفع انها تفضل محسساني اني مش عاجبها طول الوقت ؟ .. من كل النواحي
دايما معترضة على طريقة لبسي وعلى طريقة كلامي مع أهلي وعلى إختياري
لأصحابي وعلى شغلي حتى دة بتعدل عليه وكتير جدا من الحاجات الي معترضة
عليها .. هل هية إتفاجئت للدرجة دي ؟ اكيد لأ لأنها عارفة عني كل تفصيلة قبل
الزواج هية ليه طيب ما حاسبتش نفسها على إهمالها في البيت وأهمالها في إستقبالي
كويس بعد يوم شغل مرهق جدا .. وليه أنا سكت أو راعيت تعبها في البيت ومبقاش
يفرق تكون طابخة أو لأ ؟!!! ... ليه أنا راعيتها وهية لأ ؟.. دة حتى طريقة كلامها
معايا أنشف من طريقة كلام صاحبي الراجل معايا !!! ليه أنا حاسس إني متجوز
واحد صاحبي ؟ .. انا كنت اللي أعرفه عنها الوداعة والرقة قبل الجواز .. فين راحو
؟ .. فين الدلع والمياعة والأنوثة اللي الواحد يدخل بيته الاقيهم في إستقبالي أقوم أنسى
تعب اليوم كله ؟ .. فييييين ؟؟؟؟ عموت من الغيظ وطبيعي هستصعب فكرة الطلاق
لأن فيه بينا طفل ملوش أي ذنب في القرف دة .. السؤال بقى .. هل أنا هقدر أستمر
معاها علشان خاطر إبني ولا زي ما أصحابي قالولي إني لما أخلص طاقة الصبر
هوصل لنفس النتيجة وأطلقها ؟ انا محتاج إجابة من الرجالة وكمان لو ينفع الستات
أدمغة أصدقاءنا
على مشكلتي .. ممكن يا أصدقاء فضفضة تفيدوني من فضلكم ؟
علي محمد بهنس
