عقربة على فراش الزوجية
مشكلتي في حماتي مسودة عيشتي وشكل طلاقي هيبقى على ايدها هية واخوات جوزي البنات .. معنديش حمى واحدة دول ٣ الأم واتنين بنات .. كارهيني من ساعة ما اتجوزت ودخلت عيلتهم همة بكلمة وانا بألف مانا اكيد مش هسيب حقي , كل دة وانا صابرة انما الاقي العقربة الكبيرة امه بتدخل كمان في حياتنا الخاصة جدا كدة كتير بصراحة , وانا مش بلوم عليها انا بلوم على جوزي اللي ولا مرة اخد موقف يحسسني انه موجود بيه .. اليومين دول انا بفكر بجد اني اعمل فيها موقف يطلع من عينها ويا انا يا هية .. انا اللي انا محتجاه نصيحة لاني برضو مش ممكن هعيش في توتر وحرقة دم متواصل دي تبقى عيشة سودة .. وشكرا وارجو الرد .
تمارا
فضفضة
محررة الصفحة .. نيفين حجازي
مدام تمارا .. الطيب احسن .. حضرتك جربتي كل الخطط وكل ردود الأفعال العنيفة والمعاملة التي هي بالمثل والنتيجة كانت اللي حضرتك كاتباه في رسالتك , ممكن انصحك بهدنة ثم فترة صمت ثم بداية جديدة تجبري نفسك على الإلتزام بها لتجبريهم ايضا فيما بعد على الإلتزام , الكلمة الطيبة صدقة وهذا يعني ان للكلمة تأثير عظيم على نفوس الناس .. لا تستهيني بما أمرنا الله به اعرف ان فكرة تدخل الآخرين بين زوجين أمرا غير مقبول لكن من الممكن تغيير سلوكيات المحيطين بشئ من الذكاء وكما تستخدمين ذكائك في تنفيذ خططك إستخدميه لإصلاح ما تلف بينك وبين والدة واخوات زوجك .. والمجهود الذي سيبذل في الإصلاح أقل وأسهل بكثير من المجهود المبذول في المكائد .. وفقك الله وهداكي .
