زوج عدو النظافة

فضفضة

بوابة الفجر


مساء الخير يا استاذة نيفين
مشكلتي يمكن تكون فريدة من نوعها لكن حظي الإسود ورطني فيها وهية ان جوزي مش معترف بنظرية انه ياخد دش كل يوم بعد ما يرجع من الشغل لا صيف ولا شتا والمصيبة كلمته كتير بالذوق وقلة الذوق مفيش فايدة يبصلي بصة بلهاء ويسكت .. الطبيعي ان الإنسان يهتم بنظافته الخاصة .. طيب بلاش نضافة .. احساسه ايه وهوة جاي من برة في عز الحر خصوصا الأيام دي كمان الجو ابتدى يحرر فترة الضهر .. احساسه ايه يا بني آدمين ؟؟؟؟ حد يقولي من القراء ايه حل الراجل عدو المية دة .. انا قرفت خلاص .
م . ع

فضفضة
محررة الصفحة .. نيفين حجازي
الصراحة احترت ارد عليكي بإيه .. لان موضوع النضافة دة حاجة نسبية من شخص للتاني .. هتلاقي ناس فلة وهتلاقي ناس متوسطين وفيه بقى نموذج الأخ جوزك دة .. عموما .. ممكن اقولك فكرة ارجو انها تغريه او تحببه في الدش .. إملي البانيو مية بصابون له ريحة هادية وحطي على محيط البانيو شموع وحضري كباية عصير من النوع اللي بيحبه وخلي إضاءة الحمام شموع بس .. وشغلي مزيكا هادية .. طبعا انا عارفة ان اللي بقوله دة ممكن ما يفرقش معاه خالص لكن لعل وعسى ضميره يصحى ويرحمك من المأساة دي .. حاولي ما يجراش حاجة .. وطولة البال تبلغ الأمل زي ما المثل قال .