مجدي الهواري: أضفنا التاتش المصري على Ninja Warrior بهدف تشجيع الشباب العربي

الفجر الفني

مجدي الهواري
مجدي الهواري


أعرب المخرج مجدى الهوارى رئيس مجلس إدارة شركة "Advice media solutions" المنتجة لبرنامج " Ninja warrior بالعربي" عن سعادته بإطلاق النسخة العربية من البرنامج من مصر.

وأضاف الهوارى، خلال المؤتمر الصحفي الذي انتهى منذ قليل بسهل حشيش بمدينة الغردقة، قائلا: "مكان المخرج دايماً بيكون ورا الكاميرا .. وده لأنه بيجيد التعبير بالصورة .. مش بالكلمات.. لدرجة أن مفرداته وكلماته.. هما الصورة .. ممكن يكون الكلام خير وسيلة للتعبير في احيان كتير.. بس للمخرج الصورة هتفضل دايماً بالف كلمة .. عشان كدة انا هحاول متكلمش كتير .. بس انا عايز احكيلكوا عن تلات تحديات مهمين جداً في البروجيكت ده ..و الصراحة هما ماكنوش سهلين".

وتابع: "التحدي الاول .. و ده اللي انا خدته على عاتقي.. ان البرنامج ده يتصور على ارض مصر و الحمدالله ربنا وفقنا في ده .. و طبعاً مش محتاج اشكر كل واحد تعب و سهر معانا و اجتهد عشان نعمل النسخة العربيه لحد دلوقتي لأنهم عارفين نفسهم كويس و عارفين قد ايه انا ممتن ليهم و فخور بالعمل معاهم و انشاء الله تكمل على خير و ننفذ البرنامج على اكمل وجه و نكون قد ثقة شركة بنادر الخليج فينا وعلى رأسهم طبعا سمو الامير اللى انا متأكد اد ايه هو متحمس للبرنامج ده ونقلى حماسه ده وكان معانا في كل خطوة بنفسه هو و الاستاذ تركى باديب (المدير الإداري والتنفيذي) والاستاذ رأفت تركى (المشرف العام على الانتاج والشئون المالية) لشركة بنادر الخليج للإعلام .. وبحيي طبعا سيادة اللواء أ.ح أحمد عبدالله محافظ البحر الأحمر والسيد محمد كامل العضو المنتدب للشركة المصرية للمنتجعات والمطور العام لمنتجع سهل حشيش واحب اشكرهم على استضافتهم المتميزة لينا".

وأضاف: "التحدي التاني.. اللي كان اصعب بكتير من الاولاني.. اننا نطور من البرنامج و نقدم حاجة جديدة مختلفة عن بقية النسخ العالمية.. ازاي نخلي النسخة بتاعتنا محببة للمشاهد العربي وخصوصا ان المشاهد بتاعنا مش مقتصر على شعب واحد أو ثقافة واحدة زي بقية النسخ اللي اتنفذت في مختلف الدول صحيح احنا كلنا عرب وبتجمعنا في الآخر عادات وتقاليد واحدة لكني شايف انه كان تحدي جوة التحدي دا اننا نقدر نحوز على اعجاب مشاهدينا في كل االدول العربية بمختلف ثقافاتهم.. اننا نقدر نحمس الشباب انهم ينضموا للبرنامج و اللي ما ينضمش ازاي نشجعوا يتفرج عشان ينضم في الموسم اللي بعده.. كان لازم نحط التاش العربي بتاعنا زي ما المذيعة قالت.. بس انتوا كلكوا عارفين طبعاً التاتش العربي بتاعنا!".

فكان لازم نحط التاش العربي بس بشياكة و في نفس الوقت نحافظ على هوية البرنامج و فورماته الاصلي بأكبر شكل..اللي الحمدالله ربنا وفقنا فيها برضه زي مثلا فكرة اضافة النينجاوية.. الفكرة دي فعلاً شبابنا محتاجها مش بس في البرنامج.. دول محتاجينهم في حياتهم اليومية ..شبابنا محتاج حد يشجعه و يحمسه و يدله على الطريق الصح و يساعده يوصل لهدفه .. و يساعده يتخذ القرارات اصح عشان يكون ناجح .. و فعلا يفيد بلده و الوطن العربي كله.

وتابع: " التحدي التالت واللي كان اقربهم لقلبي.. هو ان ازاي نطلع بإطار للبرنامج يتعدي المحتوي الترفيهي و يحدث تغير حقيقي في حياة الناس.. من المتسابقين و المشاهدين. انا عارف انه تحدي صعب شوية.. بس احنا مكناش عايزين نعمل برنامج الناس تتفرج عليه و بعد الحلقة الموضوع ينتهي.. او يشتركوا فيه و رحلتهم معاه تنتهي بالمكسب و الخسارة.. احنا عايزين نعمل برنامج له رسالة.. محتوي يغير من ثقافتنا و ينمي الوعي الرياضي و الصحي مش بس عند الشباب.. بل عند كل الناس".

واختتم حديثه قائلا: "كان لازم نطلع بإطار ينمي روح التنافس الشريف و روح الفريق بين كل المتسابقين.. كان لازم نطلع بتحديات مش بس جسدية.. كمان ذهنية.. عشان اللي يتعلموه المتسابقين في البرنامج يقدروا يطبقوه و يفيدهم في حياتهم العملية .. والحمد لله اعتقد ان ربنا وفقنا في التلات تحديات دول.. و انشاء الله تشوفوا البرنامج لما يخلص و تحكموا بنفسكم.. نقطة اخيرة مهمة ان المشروع ده عمره ما كان هينجح لولا التآلف الموجود بين الأربع جهات المشاركة فيه.. لأن هدفنا في الاخر واحد و هو النهوض بالمستوي البدني و الفكري للشاب المصري و العربي.. عشان مستقبل احسن ليه.. و لمصر و لكل بلادنا العربية.. و انا عشان كده احب اشكر مرة تاينة بنادر الخليج للاعلام ومجموعةُERC اللى مستضيفينا النهارده واللى هيستضيفوا نينجا واريور بالعربي وجميع متسابقين الوطن العربي و وزارة الشباب و الرياضة.والمهندس خالد عبد العزيز اللى تحمس لفكرة البرنامج وهدانا رعاية الوزارة وزى ما بدأت حوارى ان المخرج كلامه صورة احب اقدملكم تخيلي المبدأى لرسالتنا في نينجا وريار بالعربي بالصورة".