عمرو سعد: "عمري ما فقدت إيماني وأنا مفيش في جيبي غير تمن تذكرة المترو"

قال الفنان عمرو سعد إنه بإصراره استطاع تحقيق أحلامه وطموحاته، رغم الظروف الصعبة التي واجهته في حياته، قائلًا: "عمري ما فقدت إيماني حتى وأنا ماشي في شوارع مصر بالليل، ومفيش في جيبي غير تمن تذكرة المترو".

ونشر "سعد"، في صفحته على "فيسبوك"، مجموعة من الصور، الثلاثاء، وكتب عليها: "صباح الحب والإرادة، أنا اخترت لكم الصور دي علشان تعرفوا إن في ناس تقدر تحول حاجات في واقعها مهملة ومالهاش لازمة وقبيحة لحاجات مفيدة وجميلة، وإنك ببساطه تقدر تغير الواقع مهما كان صعب لأن البني آدم هو اللي بيصنعه أصلًا".

وأضاف: "عاوز أقول لكم إن التغيير بيسكن في الإصرار والإرادة والحب، وإن إحنا لو بنحب شارعنا ومنطقتنا وبلدنا بجد هانتمنى نشوفهم أحلى وأجمل، والحب مش كلمة سهلة تتقال على القهاوي أو نسمعها في الأغاني، الحب إيمان وفعل، حتى طموحاتنا وأحلامنا وأهدافنا لازم نحبهم".

وتابع: "في يوم من الأيام أنا نفسي كان قدامي صعوبات لن يتخيلها أحد والظروف كانت صعبة، وفي نظر ناس كتير مستحيلة، بس استحملت وأصريت وتعبت وعمري ما فقدت إيماني حتى وأنا ماشي في شوارع مصر بالليل ومفيش في جيبي غير تمن تذكرة المترو، صدقوني نقدر بعون الله نخلق واقع جديد".