أنا ما أتجزتش إي حاجة في حياتي

 

ماجي حرفوش (مستشارة حياتية وخبيرة تعزيز إمكانيات المرأة)

 

(أنا ما أنجزتش أي حاجة في حياتي) ده غالبا بيكون إجابة 90% من البنات والسيدات اللي بعملهم coaching  على سؤال من أوائل الأسئلة اللي بسألها: "أيه أكتر حاجة عاملالك إحباط في حياتك؟"

الإجابة ديه نموذجية للستات في مجتمعنا،لإن ما فيش حد فهمنا إيه أصلا هو الإنجاز! اتربينا على المقارنات وإن اكتر إنجاز ممكن نوصله هو إننا نتجوز ونخلف. واللي مش هنكر طبعا إنه فعلا أثبت إنه انجاز في حد ذاته.

اتربينا إن كل مانخلص حاجة يتطلب مننا اللي بعدها بسرعة، نطلع المرحلة اللي بعدها من غير ماناخد فرصة نستمتع باللي وصلناله أو نحتفل بيه.
مجموع في الإبتدائية.. برافو! عقبال الاعدادية! على طول كده من غير وقفة. ومن إعدادية لثانوية عامة للكلية للوظيفة للجواز وخلفة الأولانى وبعدين التانى.

وتتنقل التوقعات للعيال أوتوماتيك، ونبتدى سلسلة الإنجازات غير المحسوسة مع ولادنا وبناتنا كلها مفصولة بكلمة "عقبال" ليه؟.. ليه لما ننجح في حاجة لازم على طول نبص على اللي بعدها؟ طبعا بالنسبة لناس اتربت كده صعب أوي تحس بطعم الإنجاز. فأي إنجاز بقى عادي...ما هو ده المتوقع أصلا وأي حاجة أقل من المتوقع يبقى فشل.. وذريع كمان.

طيب نقيس إنجازاتنا إزاي؟ عشان نخرج من دايرة الإحباط ديه؟ الإنجاز لا يمت بصلة "للمفروض" أو "المتوقع" من أي حد حوالينا.

قيسي إنجازك باللي وصلتي له بالنسبة للهدف اللي كنتي حاطاه لنفسك.. حتى لو كان هدف اليوم انك تقومي من السرير وتتفرجي على فيلم وتاكلي وتتبسطي.

الإنجاز مش لازم يكون حاجة معقدة وصعبة، ولا بعيدة المنال ولا مشابهة لإنجازات ناس تانية. كل واحد يحط لنفسه أهداف قصيرة المدى وطويلة المدى، ويقيس الإنجاز بالنسبة للأهداف دي. مع العلم إن مفيش حاجة إسمها فشل. فيه حاجة اسمها قربت قد إيه من هدفي وهو ده انجازي. وفيه حاجة اسمها غيرت هدفي.. عادي كل يوم بيعدي إحنا بننجز فيه بس.. إحنا بنركز في اللي معملناهوش مش في اللي حققناه. تعالوا نركز في الحاجات البسيطة اللي بتقربنا من أي هدف إحنا حاطينه، هتلاقينا نفسيتنا أحسن.