"جدو" : تعرضت للظلم في الأهلي .. ولو الزمالك فاوضني "هوافق"
حزين لعـدم حصـولي على الفرصة في الأهلي .. والعـودة للاتحاد حاليًا مرفوضة
الأهلي ضاف لي اسمه .. ولكن أخذ مني فنيا وتسبب في خروجي من المنتخب
محستش أن "ليا ظهر" في الأهلي .. ولكن النادي مبيكولش حق حد
الأهلي مقبرة للنجوم "اللي جايا ببلاش" وعشان تلعب لازم تكون جاي بفلوس كثير
فانلة الأهلي تقيلة بس أنا محمد حمدي زكي.. هذه رسالتي لهواة الصيد في الماء العكر
انضم للنادي الأهلي بآمال وطموحات كبيرة بعد أن كان أحد نجوم الدوري ومنتخب مصر الذي طرق أبوابه قادماً من قلعة زعيم الثغر والتي شهدت تألقه بصورة كبيرة ليلقبه عشاق القلعة الحمراء بلقب "جدو الصغير" ولكنه لم يسير على نهج جدو، وظل حبيس دكة البدلاء طوال الفترة الأخيرة .. إنه محمد حمدي زكي مهاجم النادي الأهلي الذي فتح قلبه ورد على أسئلة "الفجر الرياضي" في الحوار التالي :-
في البداية أيه تقيمك لتجربتك مع الأهلي؟
بالتأكيد تجربة جيدة جدا كللت المجهود الذي قدمته بفضل الله مع الاتحاد السكندري ومن خلاله انضممت لمنتخب مصر، وطبعًا التواجد بصفوف الفراعنة هو حلم كل لاعب كما أن اللعب بصفوف النادي الأهلي حلم كبير، لكني حزين لعدم حصولي علي فرصة مثل باقي زملائي ويعتبر أنا أقل لاعب لعب شارك في المباريات ومش عارف ليه بيحصل معايا أنا كده سنتين على التوالي.
كنت ضمن قوام المنتخب قبل الانضمام للأهلي وبعد الانتقال للقلعة الحمراء أصبحت خارج المنتخب ؟
طبعًا دي حاجة صدمتني جدًا أي نادي في مصر بيتمنى يكون عنده لاعب في منتخب مصر والطبيعي أني أكمل مشواري في المنتخب والناس تساعدني علي كدة لاكن ملقتش ظهر ليا في الأهلي.
لو رجع بيك الزمن وشايف السيناريو ده وقدامك الأهلي والزمالك أو الاستمرار في الاتحاد كنت هتختار أيه؟
لو رجع بييا الزمن كنت هختار الأهلي برضوا عشان مكنتش أعرف المستقبل في أيه ربنا هو العالم ودا عرض عمر ما أي لاعب يقدر يرفضوا طبعًا، لكن لو كان الزمالك كلمني وخلص معايا قبل الأهلي وأنا اتفقت عمري ماكنت هرجع في كلامي معاهم عشان أنا بحترم نفسي وكلمتي سيف علي رقبتي تجاه أي حد زي بالظبط ماعملت مع الأهلي عندما فاوضني الزمالك وأنا كنت مخلص مع الاهلي.
حتى لو تعرف أن نفس السيناريو ده كان بنسبة كبيرة هو الى هيحصل؟
لو كنت أعرف السيناريو كنت أكيد هفكر في الموضوع بس لو كنت متأكد أني هأخد فرصتي برضوا كنت هوافق على الانضمام للأهلي تاني مفيش مشكلة لكن لوهيحصل اللي بيحصل وملعبش خالص تفرق طبعًا.
تداول أن في كلام مع الزمالك هل الكلام ده حقيقي؟
حاليًا لا لكن ممكن يحصل مع مرور الوقت.
لو أتعرض الزمالك في وقت من الاوقات ممكن توافق؟
لو حسيت أني في الأهلي مليش وجود وهما بايعيني أكيد هوافق.
هل تغيير الأجهزة الفنية سبب فيما يحدث لك بالأهلي ؟
لا.. أنا طلبت الرحيل عن الفريق على سبيل الإعارة، لأني شعرت أني مهما أتدرب بقوة لن أحصل على فرصة مع الفريق والأجهزة الفنية أشعرتي بذلك.
هل ترى أن إعارتك مفيدة خصوصًا أن تجربة سموحة لم توفق بها ؟
أكيد مفيدة جدًا وأهم شئ أن أكون في الملعب لشكل مستمر للعودة من جديد لمستواي المعهود.
لماذا رفضت عرض الإسماعيلي في الصيف واستجبت لنداء العودة للأهلي؟
مقدرش أتاخر عن الأهلي لو قال محتاجني، ودة كان بعد ما كلموني علي طول وقالولي أنت راجع وربنا يوفقك معانا السنادي، مع أن كنت عارف أني سأكون خارج التشكيل الأساسي، وهذا وضح من طريقة تعاملهم معي في التدريبات وفي المباريات، أشعروني بأنني ملكش وجود، ويوجد تجاهل تام لي في التدريبات، فلذلك مهما تتمرن مبتلعبش ولا تدخل قائمة المباراة ، ولاعبين لا يخوضوا التمرين بجد ويكونوا داخل قائمة العشرين .
هل قصر عليك ده خلال التدريبات وبقيت مشدود؟
لا.. بس أنا بشر ومن الممكن أن أشعر ببعض الضيق، ولكن برجع أرمي وراء ظهري.
هل أتظلمت في الأهلي؟
كل الناس شايفة أن أنا أكثر لاعب اتظلم في الأهلي عشان كدة أتكلمت، مقدرش أشوف أني بتظلم وحقي بيروح ومتكلمش .
هل حصلت على مستحقاتك من الأهلي بشكل كامل؟
نعم.. حصلت على كل مستحقاتي، النادي الأهلي عمره ما أكل حق حد، حتى إلى بيمشي من النادي .
هل حسيت أن البدري بيكرهك؟
لا.. مش بيكرهني، بس أكيد عليه ضغوطات كتير
ما حقيقة هجومك علي الجهاز الفني في الغرف المغلقة؟
أنا عمري ماهجمت أي مدرب
من وجهة نظرك أزاي اللاعب الجديد يقدر يلعب في الأهلي بشكل أساسي؟
لازم يكون جاي بفلوس كثير ده المعيار في الأهلي لو جاي بمبلغ قليل أو ببلاش عمره مهما قدم ما هيلعب.
ماذا عن مفاوضات أهلي طرابلس الليبي معك وكذلك إنبي؟
لاتزال المفاوضات مستمرة من جانب الناديين ولكن الأقرب هو اللعب بصفوف إنبي .
وماذا لو عرضوا عليك العودة مرة آخرى للاتحاد السكندري؟
االاتحاد السكندري بيتي ولكن لن أستطيع العودة لزعيم الثغر في ظل وجود بعض الأشخاض المتواجدين حاليا .
هل تفكر في تجربة جديدة خارجية بعد ما تثبت نفسك في فترة الإعارة؟
أولا.. أنا مش محتاج أثبت نفسي أنا عارف نفسي الحمد لله كويس أوي، وأكيد في يوم من الأيام هلعب برة مصر.
هل شايف أن الأهلي مقبرة للنجوم؟
لا.. هو مش مقبرة للناس اللى جايا بفلوس كتير لأنه لازم يلعب ولو لعب كويس بيكمل.
هل فعلا فانلة الاهلي تقيلة؟
أكيد تقيلة بس أنا محمد حمدي زكي، هي تقيلة بس على اللاعبين الذين لم يلعبوا لأندية كبرى.
الأهلي أضاف لمحمد حمدي ولا أخد منه؟
أضاف كتير أوي اسم النادي الأهلي لوحده بطولة، ولكن أخد مني حاجة كبيره أوي، وهي ابتعادي عن المباريات، بجانب الاستبعاد من قائمة المنتخب الوطني.
هل تتوقع أن يتكرر السيناريو الخاص بك مع أحمد الشيخ رغم تألقه الأخير ؟
والله أنا مش شايف أن حد هيعمل أكتر من الى انا عملته مش كوره بس طبعًا، انا لسه معملتش حاجه في الكورة، لكن أنا كنت في المنتخب ومكسر الدنيا قبل انضمامي للأهلي ولم ألعب، لكن الشيخ لاعب كبير وإمكانياته عالية جدًا ويستحق أن يلعب في الأهلي وأتمني أن يكون موجود ويلعب كمان في منتخب مصر.
ما هو رأيك في المنتخب المصري حالياً؟
منتخب جيد وأتمنى الحصول على بطولة أفريقيا .
كيف ترى المنافسة على درع الدوري هذا الموسم؟
طبعًا لسه بدري جدًا لكن أتمنى الأهلي يحصل علي اللقب إن شاء الله، وقال ضاحكاً "كدة يبقى بطولتين لينا وأنا ملمستش كورة أمال لو لعبت بقى".
من هو اللاعب الذي كنت تتمنى أن تلعب معه؟
محمد أبو تريكة طبعًا ومحمد بركات والذي أعتبره مثلي الأعلى
ما هو النادي واللاعب المفضل على المستوى الأوروبي؟
ريال مدريد وكرستيانو رونالدو
ما هي هوايتك المفضلة بعيدًا عن الكورة؟
هوايتي الكرة فقط
من هو نجمك المفضل سواء في التمثيل أو المطربين؟
كثير جدًا أحمد السقا ومحمد رمضان ومحمد عادل إمام وحسن الرداد من نجوم الفن أما من المطربين فأنا لا استمع للأغاني .
من هو الذي أطلق عليك لقب جدو الصغير؟
أحمد حجازي
في النهاية تحب توجه رسالة لمين ؟
بالنسبة للناس اللي بتصطاد في المية العكرة أحب أقولهم أنهم مش هيعرفوا يوقعوني في الغلط مع جمهور النادي الأهلي ولا مع مسئولي النادي الأهلي، أنا ماجرمتش أني عايز العب ومش عايز أقعد علي الدكة، وأنا فعلاً لو قولت أنا مش موظف كان ايه رد فعلهم، هو أنا لو طلبت العب يبقى بيتنطط ولو مطلبتش تقول عليا موظف وانك معندكش طموح والكلام ده حقيقي فعلاً حاجة غريبة.
