بسبب التراخيص.. إغلاق محل "حسنى" للمشويات
أما المفاجأة هذا الأسبوع أيضا فتم غلق محل «حسنى» للمشويات المجاور لفرع «عبدالوهاب» بالداون تاون، وانتشر الخبر كالهشيم، أصحاب المحل أصدروا بيانا قالوا فيه «المطعم ما اتقفلش بسبب أكل ولا حاجة.. ده بسبب بعض الإجراءات فى التصاريح»، وأنا أضيف للكارثة ما يلى:
فى العام الماضى وأثناء فتح المحافظ السابق محمد عبدالظاهر لملف الحديقة الدولية الذى «اتطرمخ عليه»، وياريت الرقابة الإدارية تفتحه تانى وعندى ورقه، تم غلق مشويات حسنى وعبدالوهاب لعدم وجود تراخيص بالإضافة أن حسنى كان واخد جزء مستقطع من الشارع ضمه للمطعم.. المهم قفلوا وشمعوا لهم المحلات وراحوا جابوا وسايط للمحافظ والدنيا، وعندنا عمال وفاتحين بيوت، قوم فتح الحى لهم مرة أخرى بشرط البدء فى إجراءات التراخيص.
المهم.. بعد قصة تسمم الطفل من قرية المشويات فرع السيوف تذكر الحى أن قرية حسنى للمشويات لم تكمل تراخيصها، قوم يا سادة أغلقوا لحسنى المكان، جرى على المحافظ وقال له: عندى (500) عامل، وأوعدك هسير فى استكمال الإجراءات، وأنا مقدم على رخصة بس الحى هو اللى معطلنى؛ علشان الاشتراطات بتاعة الأمن الصناعى والاشتراطات الصحية وكلام كده، قوم فى ذات اليوم يتم فتح المكان لكن فى كل الأحوال هناك علامات استفهام، وتواطؤ محليات متمثلة فى الحى اللى سايب 80٪ من محلات الداون تاون مطاعم وكافيهات فاتحة بدون تراخيص، وتقلب فى جيب الناس ولا ضرائب ولا يحزنون.
وعندما مات الطفل ذهبوا ليحفظوا ماء وجههم، طيب بقية المطاعم نظامها إيه؟.. يا بتوع حى وسط ردوا، إذا كان سيادة النائب الشاب الهمام راح يربت على كتف أصحاب مطعم فرعه لسة طفل متسمم عندهم وشمعوه، بالمناسبة ضباط مباحث تموين الإسكندرية ضبطوا ألفى عجل قادمة من البرازيل على الحجر الصحى فى الإسماعيلية، المفروض يتم ذبحها هناك وتختم بخاتم أزرق لأنها عجول ولحوم مستوردة، صاحب العجول أدخلها قرية اسمها العراق بالعامرية، حتى يذبحها ويختمها بالخاتم الأحمر، على أنها لحوم بلدية ويتم توزيعها على محلات الجزارة الكبيرة والمطاعم فى الإسكندرية، إنها لحوم بلدى الكيلو اللى مفروض يكون بـ(70) جنيها يباع بـ(200) جنيه.. ولا إله إلا الله، لنا الله.
