إيمي سالم تنفصل عن زوجها

أعلنت الفنانة إيمى سالم انفصالها عن زوجها الفنان اللبنانى غسان المولى بعد 10 سنوات من الزواج.

وكتبت عبر حسابها على موقع التواصل الاجتماعى "فيسبوك": "أولا... أحب اشكر الـ412 Missed call اللى جولى فى خلال ساعتين وال 1293 message.. ثانيا: كنت بفضل خبر انفصالى عن أبو أولادى ما يخدش الحجم الأوفر ده... لا احنا أول ناس ولا آخر ناس تنفصل.. ومهما كان احنا عشرة عشر سنوات نتج عنها ثلاث صبيان اللى لسه مايعرفوش خبر الانفصال فى حين أن الوطن العربى كله عرف وده حاجه مخليانى فى غاية الاستياء.".

وتابعت: "ثالثا: أرجو عدم التحدث فى هذا الموضوع لأن فى مقولة بتقول إن البيوت أسرار.. بس واضح إن المقولة دى عمرها الافتراضى خلص..رابعا: مش من حق أى حد يعرف التفاصيل.. لأنها المفروض حاجة شخصية (المفروض)".

وواصلت: "خامسا: يا ريت الكلام يبقى على قد اللى انا بكتبه وما يخدش حجم أكبر من حجمه لمصلحه الغير.. وما ننساش أن فى اولاد فى يوم من الايام هيقروا اى حاجه هتتكتب عن ابوهم وامهم...فيا ريت نراعى ربنا فى ده سادسا: سيظل غسان عشره عمرى وحبى الاول وابو احلى ٣ ولاد فياريت لا حد يألف ولا يبتكر سيناريو لسبب الطلاق.. لانه فى الاول وفى الاخر نصيب... ومحدش عارف ربنا كاتب ايه".

وأضافت: "سابعا: السوشيال ميديا نقمتها أكبر من نعمتها... ويا ريت الناس تستخدمها فى الإطار الصحيح لما صنعت له وليس لضرر الغير...ثامنا: ربنا يهدينى ويهديه عشان خاطر الولاد قبل خاطرنا {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}".