مهرجان شرم الشيخ "عك فى عك"
مهازل مهرجان شرم الشيخ لا تنتهى، أول حاجة كان تبع مؤسسة «اسمها إيه» بحجة تنشيط السياحة، وهات يا واد كام رجل أعمال للرعاية وكمان رعاية هيئة تنشيط السياحة، أقيم مهرجان سينما وراح ناس كثيرة، المهم.. البداية المراسلون المصريون لا يقيمون بفنادق، وسيقيمون على نفقة مؤسساتهم الصحفية، وفقط المراسلون الأجانب هم من سيقيمون على نفقة المهرجان، ليه يا عم.. علشان بتنشط السياحة؟
ثانيا: فنانون قالوا لهم تخلصوا وتمشوا، وفنانون آخرون انتم معانا لآخر المهرجان، على رأسنا.. بس ليه متعرفش، ثالثا: كلام من أحد المسئولين، إيه الفنانين دول اللى انتم داعيينهم، دول «أولد» قوى، مفيش واحدة هتلبس مايوه وتنزل البحر وتتصور وتنزل الصور بالمجلات اللى خارج مصر، وكلام من عينة راحت على سمير صبرى ونبيلة عبيد وسهير شلبى، قوم سمير صبرى احترم تاريخه ونفسه ونزل وترك المهرجان.
رابعا: كان فيه ندوة لنوال السعداوى ضيف شرف المهرجان بمناسبة يوم المرأة العالمى والمصرية، وقالوا لها إحنا هنخلى الأمير زوج ملكة الدنمارك يلقى الكلمة بدلا عنك، الست رفضت وسابت الدنيا لهم ومشيت، ونعم المهرجانات والله.. أهم حاجة الرعاة وأصحاب الجمعية اتلمعوا واتصوروا ولا لأ؟!
