ربيع العمر

وحضرت فعلا سيدة ذو جمال باهر ومتوسطة العمر وذات ذوق رفيع في اختيار ملابسها وعطرها الفواح .

سألت نفسي ماهي مشكلة هذه السيدة وهي كما تظهر ذات مال وجمال هل ممكن ان يخونها رجل او تبحث عن زوج او تحتاج لعمل او مصاريف المنزل لاتكفي ؟؟؟ خطرت ببالي اسئلة سريعة سرعان ماتبددت بعد سماع حكايتها .

سألتها ان تحكي لي مشكلتها ببساطة واذهلتني باجابتها انا متزوجة ولي اثنين من الاولاد في الجامعة (وان كان يظهر عليها صغر السن ) تزوجت منذ عشرون عاما او اكثر اولادي علي وشك التخرج زوجي علي درجة وزير وتم الاستغناء عنه بعد ثورة يناير ولكن لم يكن مشترك في اي قضايا تسئ لامانته لكن محسوب علي النظام القديم .وفعلا خرج علي المعاش وكنا نعيش في هناء وسعادة قبل خروجه نسافر كثيرا اجمل الاماكن واجمل المطاعم واولادنا الحمد لله في كليات القمة وعلي خلق وحالتنا الحمد لله ميسورة وانا ايضا عائلتي معروفة وميسورة اب عن جد  ومتعلمة في الخارج

زوجي مريض السلطة  مش مصدق نفسه انه علي المعاش جاله نوع من الاكتئاب بعد ماكان شعلة نشاط اصبح ملازم المنزل وحزين مفيش خروج مفيش سفر عايزنا  في البيت جنبه ..تعالي نروح النادي لا... تعالي نروح سينما لا... تعالي نلعب رياضة خفيفة لا... تعالي نعمل مشروع برضه لا... طب انت عايز ايه ؟ ولا حاجة 

ساءت حالته من اسوء الي اسوء وبدأ يضايق اولادي ويحجر علي خروجاتهم مع اصدقائهم وايضا يحجر عليه ايضا ان اذهب مع صديقاتي علما ان مفيش اي نوع من الغيرة من ناحيته وانا احبه جدا .

مش عارفة اعمل ايه ؟ حتي اهله مش عاجبهم تصرفاته وفي نفس الوقت  الشئ الغريب عايز يعيش يشتري احسن المأكولات من احسن المحلات والمياه المعدنية الفرنساوي ....الخ ولما اسأله ليه البذخ احنا الحمد لله كويسين بس بلاش تبذير يقولي انا اكل كدة وبحب اعيش كدة .. حتي لما السائق يغلط يهينه امامي بمنتهي القسوة ومن كتر كسوفي اترك المكان واخجل من وجودي اثناء المناقشة واقول في نفسي ايه ده بيتعامل مع الناس بمنتهي الجبروت كأنه مازال في الخدمة.

ولما سألته لماذا هذا البذخ  وهذه التصرفات قالي انا مقدرش اعيش غير كدة .... الغريبة اني مختلفة عنه وبعيش عادي وبأكل العادي ومايهمنيش اشرب ايه واكل ايه متأقلمة بحياتي الجديدة ومش شاعرة بأي مشكلة او اختلاف لكن هو اللي اصبح عصبي جدا ويثور علي اتفه الاسباب ومش عارفة اعمل ايه ؟ اروح لدكتور نفساني ولاانتحر  ولا اعمل معاه ايه ؟