اضطرابات بعد صدمة الفراق
لما بيموت حد غالي ع قلبك و بتفوق من الصدمة الأولي انك خلاص مش هتشوفه تاني بتحب تتكلم عليه و تحكي مع الناس عنه كتير جدا جدا و عن تفاصيله المهمه جدا بنسبالك.
شويه تضحك وانت بتحكي عنه ف موقف كنتوا فيه سوا وفرحانين وفنص الضحكه عينك تدمع عشان افتكرت انه خلاص حاليا مش باقي منه غير روحه الغير مرئية اللي بتلف حوليك طول مانت فاكره.
وشويه تبكي بحرقة انه سابك لوحدك مهما كان حوليك العالم كله هتفضل حاسس بغربة من غيره.
دورك كمستمع لإنسان فقد حد انك تسمعه وانت ساكت تبتسم معاه وقت مايبتسم وانك تتقبل لحظه ضعفه اللي بتنقله من ضحكة عاليه لدموع غزيرة مسبباله وجع ف القلب، و ماتقولش عليه اتجن.
غبي اللي قالك أن العمر بينسي احنا طول ماحنا عايشين وفاكرينهم قلوبنا و عقولنا بترفض نسيانهم
كل يوم بنهون ع نفسنا أننا قربنا.
يمكن الدور اللي جاي يبقى علينا احنا و نقابلهم ونخلص من وجع فراقهم.
يارب صبر كل إنسان فقد روحه بعد موت أغلى انسان عنده.
يارب لا تحرمنا رؤيتهم ف منامنا.
و أرضي عنا وأحسن ختامنا يا الله.
