"حجاجوفيتش": شركات المحمول في مصر تقدم أسوأ خدمة بأعلى سعر
علق الرحالة المصري، أحمد حجاجوفيتش، علي قرار زيادة أسعار كروت الشحن، بنسبة 36%، موضحًا أن معظم دول العالم تسعى دائمًا لتقليل أسعار المكالمات.
وكتب "حجاجوفيتش"، عبر حسابه بموقع التواصل الاجتماعي "فيس بوك"، اليوم الأحد، "للاسف علي الرغم من أن العالم كلة دلوقتي بيتكلم علي ال 5G وأن ازاي الشبكة ال 5G توصل سرعة التحميل في الانترنت ل ١٠ جيجا في الثانية الواحدة.. يعني تنزل فيلم Full HD في أقل من ثانية.. هنا في مصر لسة مفتكرين حاجة اسمها 4G.. اللي العالم بقاله بيستخدمها من ٢٠١٠.. يعني ٧ سنوات فرق ومحسسينا انه انجاز".
وتابع: "مش بس كدة أول ما طرحوها واللي مش لاقيها في أي مكان.. راحوا هوب مخليين الكارت أبو ١٠ جنيه اللي بتدفع فيه اصلا ١٢ جنيه بقي يديك ٧ جنيه!! وده قمة الاعجاز العلمي! ما كانوا يخلوا ال٢ جنيه بجنيه علي طول".
وأضاف: "في العالم كله بيدوروا ازاي يخلوا المكالمات بسعر قليل!! زي اوروبا مثلا اللي لغت كل تجوال المكالمات والانترنت بين كل بلادها.. واحنا بنغلي كروت الشحن ونقلل قيمتها، في مصر لو عاوز تعمل اصغر باقة للانترنت والمكالمات عاوز علي الاقل باقة ب ١٠٠ اللي حتدفعلها دلوقتي ١٧٠ جنيه فعليًا.. في حين ان مثلا في دولة زي الدنمارك ال ٩٩ كرونة حتديك ٣٥ جيجا ورسائل مجانية ملهاش عدد وكمان ١٠ ساعات مكالمات لأي نمرة (أرضي أو موبايل) في الدنمارك واوروبا و٤٧ دولة تانية كمان"؟
وواصل: "بالنسبة للمكسب احنا حوالي ١٠٠ مليون شخص (٢٠ ضعف سكان الدنمارك) في حين ان الدنمارك ٥ مليون شخص.. يعني لو شركات الدنمارك كسبت في الساعة علي أسوأ تقدير مليون جنيه.. شركات المحمول عندنا حتكسب ٢٠ مليون، يا تري العيب في مين؟ فينا احنا كمستهلكين للخدمات واننا بنسمح للشركات انها تستغلنا؟ ولا في الشركات بإنها بتقدم أسوأ خدمة بأغلي سعر؟! ولا من الحكومة بإنها بتسمح بالإستغلال ده انه يحصل؟، لازم كلنا نقف وقفة قوية قدام شركات المحمول الفاشلة اللي عندنا في مصر لغاية ما يحترمونا ويحترموا تفكيرنا ويعاملونا معاملة آدمية!".
وتابع: "لو سكتنا المرة دي زي كل مرة.. مش بعيد بعد كدة اما تشتري ب ١٠٠ جنيه لحمة او خضار.. يقولك البايع هات ١٢٠ جنيه وحديك لحمة ب ٧٠ جنيه، والنص لتر بنزين يبقي ب٥ جنيه ويقولك إحنا ماغليناش قيمته إحنا قللنا البنزين اللي حتاخده بالقيمة دي،لكي الله يا مصر... إحنا بجد مقبلين علي أيام سود".
