| بعد أيام قليلة من أحداث نجع حمادي الإجرامية التي لا يرضاها إنسان ولا يقبلها ضمير، خرج القمص زكريا بطرس علي قناة «الحياة» التي يبثها من قبرص ومن خلال برنامجه "حوار الحق، الذي يبث من خلاله سمومه علي الإسلام والمسلمين، ليقدم التعازي إلي الضحايا الذين اعتبرهم شهداء، وأنهم قضوا العيد مع المسيح في السماء.
لكن بطرس لم يفوت المناسبة دون أن يوجه أحقاده للنبي محمد صلي الله عليه وسلم، زكريا قال بالنص:"أنا لا أدين المسلمين حتي أولئك الذين ارتكبوا هذه المجزرة، لا أدينهم، لكنني أدين محمد الإرهابي الأول الذي أسس الإرهاب، فاتبعه هؤلاء المخدوعون والمضللون من الشعب والحكام، فكل هذا يتم تحت مرأي ومسمع من الحكومات، وهم ينفذون وصية محمدهم «قاتلوا الذين لا يؤمنون بالله ولا باليوم الآخر»، ولهذا أحبائي نحن نعفو عن المعتدين ونسامحهم، ونصلي إلي الله أن يتعامل معهم، نعم محمد قد حرض علي قتل الأبرياء لأنهم غير مسلمين.
كانت هذه كلماته بالنص مسجلة، دع عنك أنها أكاذيب من السهل تفنيدها، لكنها كذلك وقحة وخارجة عن اللياقة، وتخيل لو أن مسلما استمع إلي مثل هذا الكلام في حق نبيه، كيف يكون رد فعله وكيف يكون تصرفه، إنه كلام محرض علي الفتنة، فما في ذلك شك.
قبل أيام من هذا الحديث الغث، كان البابا شنودة ضيفا علي عمرو أديب في قناة «أوربت»، وطلب منه عمرو أن يقول رأيا فصلا في زكريا بطرس، لكن البابا شنودة تهرب من أن يقول رأيه في زكريا، هذا ليس تخمينا ولا فهما علي نحو خاص، لكنه يبدو من كلمات وردود البابا التي كانت غامضة ومريبة أكثر مما ينبغي وهذا بعضها:
عمرو:المسلمون بيطالبوا البابا اشلح فلان أو احرم فلان ولغاية دلوقتي نفسهم يشوفوا موقف من الكنيسة المصرية يرضيهم؟
البابا: أولا مفيش قساوسة داخل مصر بيهاجموا الإسلام ولا يستطيعون، أما خارج مصر فما حكمنا عليهم ؟
عمرو: أن تحرمه وأن تشلحه وأن تهاجمه .
البابا: في هذه الحالة يطالبونني بالمثل يعني يقولوا إذا كان فيه حد بيهاجم الإسلام .
عمرو:زي زكريا بطرس مثلا .
البابا:فيه عشرات أيضا بيهاجموا المسيحية وفيه كتب مطبوعة وفيه مجلات، يعني ما أسهل إن أي واحد من المسلمين يقول الإنجيل بتاعكم محرف .
عمرو:ده بيتم مهاجمته من فضيلة المفتي ومن شيخ الأزهر، وأظن حضرتك بتسمعه كتير من المفتي وشيخ الأزهر وهما دول الرموز اللي موجودين في الدولة لماذا لم نسمع من الكنيسة ؟
البابا: استناني بس، شيخ الأزهر رجل معتدل، وزير الأوقاف أيضاً رجل معتدل، لكن فيه ناس...
عمرو: حضرتك مذكرتش المفتي .
البابا: أنا بذكر الأشخاص اللي تعاملت معاهم واختبرتهم وشفتهم، وأيضاً لم أذكر المفتي بانتقاد، أنا بس بقول عن اللي اختبرتهم، فيه أعضاء من أصعب ما يكون وياما بيقولوا وعضو بيكون في مجمع البحوث الإسلامية برضه .
عمرو:هؤلاء يتم انتقادهم وأعلي رأس في الدولة اللي هو بيمثلوا الديانة الإسلامية في مصر اللي هو المفتي وفضيلة شيخ الأزهر أو بنتكلم علي شيخ الأزهر أو وزير الأوقاف بيطلعوا دائماً بيقولوا، إن هذا الكلام غير صحيح، لماذا لم نجد تصريحا من الكنيسة القبطية، احنا ضد زكريا بطرس ، بلاش نشلحه أو نحرمه، نعمل أي حاجة عشان المسلمين يحسوا إن فضيلتك مش موافق علي الكلام ده؟
البابا:أنا لا أوافق علي جرح شعور إنسان في دينه إطلاقاً، لكن سيقال لي إنت مقدرتش تتشطر وتستخدم سلطانك غير ضد هذا الكاهن المسيحي، وسايب الناس يخبطوا في الدين المسيحي ليل ونهار وقاعد ساكت، يبقي بتتملق المسلمين؟
عمرو: مين بيقولك يا سيدنا؟ هو فيه حد يقدر يكلمك ؟
البابا: كل ما أبتغيه هو إرضاء من يهاجمون المسيحية وأن أعاقب كاهن، تفتكر حضرتك هل زكريا بطرس هو الشخص الوحيد اللي بيهاجم الإسلام بره؟
عمرو:لا فيه كتير ..طب إنت موافق ع الكلام اللي هو بيقوله ؟
البابا:أنا مبخشش في المواضيع دي صدقني ولا أعرف ..
عمرو:أمال أكلم مين يا أبونا ؟ لازم أكلم سيدنا، هو اللي معاه الملف ده، أنا مقولتلكش هاجمه، أنا سألتك إنت عاجبك الكلام اللي هو بيقوله ؟
البابا:شوف أقول لحضرتك إيه أنا حاليا يندر إن أنا أسمع صوته، لكن زمان سمعت بعض الحاجات وبعدين كان بيقول: أنا بتساءل وألجأ لشيوخ المسلمين الأفاضل يردوا علينا، فأصبح فيه حوار بينه وبين شيوخ المسلمين، يردوا عليه، دي مسألة حوار، لكن أنا أحشر نفسي ليه في الوسط.
عمرو:إنت متفق مع اللي بيقوله يعني مثلا : أما يقولك إن الحج ده كان اسمه الحك لأن نساء المسلمين كان حد بيلمسهم وهما بيطوفوا حوالين الكعبة.
البابا:الكلام ده محدش يقبله.
عمرو :بالظبط ده اللي أنا عايز أسمعه.
البابا:لكن.
عمرو:لكن إيه ؟
البابا:معلش متزعلش، لكن هو أشار إلي بعض موضوعات لم يرد عليها ده في القديم أيام ما كنت بسمع .
عمرو:واحنا نرد عليه ليه ؟
البابا:معلش يا حبيبي متردش ليه ؟ إذا كان داخل في حوار ويقول أنا مجرد بتساءل وبطلب من الشيوخ المسلمين الأفاضل إنهم يردوا ..
عمرو:طب ما احنا بنتساءل احنا كمان .
البابا:قال رضاع الكبار وقعد يثبتها ودي في مصر خدت دورها، وبعدين اتكلم عن بول بيدرس في الإسلام ولقي أمامه أمور.
عمرو:طب حضرتك مش من مجلسك ده مش حاسس إن الراجل ده بيعملك مشكلة في مصر يعني لما يسمعه شاب متحمس كده وللا بتاع مش هيروح يضربه في قبرص يعني ، هيدور علي أقرب مسيحي ليه هنا يعني إنت حضرتك مش حاسس بمسئوليتك تجاه ما يقال وهذه الأشياء اللي بتثير غضب المسلمين؟
البابا:إحنا لا نقبل إساءة للمسلمين، لكن إذا كان فيه أمور فكرية هو ..
عمرو : وغير الفكرية اللي فيها تجاوز وفيها سب للإسلام والمسلمين، في يد سيدنا أن يصدر بياناً، وأنا أظن إن المسلمين والمسيحيين هيبقوا سعداء به.
البابا: هل ده هيوقفه عن الكلام؟
عمرو:عنه ما وقف بقي ، لكن ده هيمنع مسلم يقول لمسلم آخر: لا ده البابا شنودة كذا مرة الناس سألوه وقال ما انتو كمان عندكو وخليه يتكلم .
البابا:أنا مقولتش خليه يتكلم، لأ خلينا ناخد الكلام كما هو بالحرف، أنا لا أعرف أين يوجد.
عمرو:في قبرص .
البابا:لو كنت تعرف إن هو في قبرص كان الناس يروحوا يقتلوه هناك، لكن يقيناً مكانه غير معروف .
عمرو:مالناش دعوة بمكانه، لماذا لا تصدر الكنيسة حتي مش بتوقيع البابا بياناً تندد بما يقوله زكريا بطرس من أكاذيب عن الإسلام.
البابا:أنا معرفش هو بيقول إيه يعني زي ما قولت لحضرتك أنا في الأيام الأولي اللي استمعت إليه وبعد كده مبقتش أسمعه أبداً، فإذا كان فيه حاجات جديدة أنا معرفهاش .
عمرو:ممكن نجيبلك الجديد يا سيدنا، لكن أنا أشعر إن البابا شنودة نفسه لو طلع منه تصريح زي ده أو من الكنيسة المصرية تصريح مثل هذا، هيريّح كثير من قلوب المسلمين، ويبتدي هذا الاحتقان يقل يعني.
البابا:احنا فعلا منعناه عن الكهنوت من زمن ..
عمرو:يعني يا سيدنا هذا الرجل أخطأ فيكم وأخطأ فينا.
البابا:أنا لا أبيح لنفسي إنه يخطئ في المسلمين، احنا مشاعر المسلمين نحترمها ولا نرجو لهم سوءا .
عمرو:أنا سؤالي أنا آسف معلش أنا ممكن أكون بضايق حضرتك بالسؤال ده ولكن هو سؤال الكثير من الناس في الشارع يعني أنا كان في برنامجي عدد من القساوسة المحترمين اللي جم عندنا وردوا نفس الرد بتاعك، قالك ما تسكتوا محمد عمارة وتسكتوا فلان وذكروا أسماء معينة ، فواضح إن ده اتجاه : احنا سايبين ده عشان انتو سايبين دول ، سكتوا دول ، واحنا نسكت دول . هل دي الاستراتيجية ؟
البابا:أنا بقولهالك علي لساني . أنا أرفض أي جرح لشعور إخوانا المسلمين في دينهم، هقولك إيه أكتر من كده .
عمرو:يعني معلش هنجيب لحضرتك السيديهات وجايز وقت ما تشوف السيديهات يكون فيه يعني حضرتك ما تراه بحكمتك هيكون مهم جدا.
انتهي كلام البابا شنودة عن زكريا بطرس، ولو وضعناه جنبا إلي جنب ما قاله القمص الملعون، سنجد أنفسنا أمام حالة من الإصرار علي التصعيد الطائفي من البابا والقمص، ولا يمكن أن نبرئ ممارسات رجال الدين المسيحي من صناعة الفتنة الطائفية وتعبئة النفوس بالكراهية.
لقد بحث الجميع عن أسباب ما جري في نجع حمادي، وسكتوا عن إدانة ما يقوم به الأقباط، ربما لأن الظرف غير مناسب، وربما لأنه لا يجب أن نغضب الأقباط أكثر مما هم غاضبون، لكنني أردت أن أشير إلي هذا الجانب من الصورة، لأن مصر عندي أعز من الأقباط، خاصة أن عمرو أديب لم يطلب من البابا شنودة كثيرا، لقد طلب منه أن يتبرأ مما يقوله زكريا بطرس لكنه لم يفعله، وهو ما يؤكد أن الفتنة ممتدة تحت العمامات السوداء من القاهرة حيث يعيش ويحكم البابا شنودة إلي قبرص حيث يبث زكريا بطرس سمومه.
|