اتمنعت من الغناء في مصر.. سميرة سعيد تكشف عن تفاصيل بداية مسيرتها الفنية

في حلقة مليئة بالأسرار حلت الفنانة سميرة سعيد في ضيافة برنامج بصمة عبر شاشة تلفزيون قناة الشرق ديسكفري، وكشفت العديد من الأسرار التي تسردها للمرة الأولى عن طفولتها وأسرار في حياتها الشخصية بالإضافة للمشاكل التي واجهتها في مسيرتها الفنية، وعن حقيقة منعها الغناء في مصر في بداية مسيرتها.

قالت سميرة سعيد خلال لقائها في برنامج بصمة: “ابتديت اتشهر، وابتديت يكون ليا حفلات كتير في مصر وكان في ناس كتير أوي من الفنانين حسوا أنتي جاية من المغرب، أنتي عندك فرص كتير أوي وفي المقابل في ناس كتير محتاجة نفس الفرص ومش بتحصل، وقتها نقابة الموسيقيين طلعت فرمان بمنع سميرة سعيد من الاشتغال في أي حفلة في مصر لتعدد ظهورها والمسبب كان غريب جدًا ورفعنا قضية وكسبناها وقتها”.

وأردفت: “والمغاربة ابتدوا يحسوا أني بسيب الأغنية المغريبة وبقيت المطربة المهاجرة، وفي مصر بقيت محسوبة على المطربات الوافدات فبقيت حاسة أنا مهاجرة ولا وافدة أنهي واحدة فيهم، ومع الوقت كل الأشياء بتاخد مكانها”.

سميرة سعيد تكشف أسرار في طفولتها

كما قالت سميرة سعيد خلال لقائها في برنامج بصمة:"أول مرة أحس بأن حاجة بتشدني، مرة كنت قدام المرايا الساعة 7 الصبح، ورايحين المدرسة المفروض ألبس، وقفت قدام المرايا وأهلي قاعدين في أوضة النوم شافوني شوية بترقص مع نفسي، وشوية أغني أم كلثوم، وفجأة ببص ورايا الاقيهم بيضحكوا وطبعًا اتكسفت وروحت جري على طول إحساس بالخجل فظيع كأني عملت مصيبة".

وأضافت سميرة: “وبعد كدا كان بيحب أنيس أخويا حد في الجامعة معاه وماسك المخدة وأم كلثوم بتغني في كل شهر أغنية جديدة وأنا مش فاهمة هو بيعمل كدا ليه وايه حالة الشجن العظيمة دي اللي هو حاسس بيها، وأنا بسمعه ابتديت أحس، وكنت كل ما بلاقي مزيكا حلوة في أي حتة بسمع وابتديت أحس أن الموضوع يعني لي كتير”.

وتابعت: “في المحيط العائلي والمدرسي اتعرفت أني البنوتة اللي بغني أم كلثوم وشريفة فاضل ولما كان بيبقى في أفراح في الأسرة كانوا بيقولولي سميرة أطلعي وغنيلنا في أي مناسبة، كل دا بيقول أن البنت دي لازم نقدمها للناس، ولما قدمت في أول برنامج مواهب أمي اخدتني على البرنامج وعملت بروفة يومها على الأطلال وتاني يوم صورنا، تالت يوم كنت خلاص الطفلة المشهورة، وقتها كان عندي 9 سنين ونص”.