رامي صبري في حواره مع "الفجر الفني": ريهام سعيد غلطانة
وصل لجمهوره بإحساسه ومصدقيته في الغناء،
وأغانيه التي لمست قلوب كثيره من الشباب، بدأ الغناء منذ فترة ليست طويلة، ولكنه استطاع
أن ينجح نجاح كبيرًا في فترة قصيرة، و ينافس كبار المطربين، إنه الفنان رامي صبري ملك
الإحساس.
ويشارك رامي صبري، في مهرجان الموسيقي العربيه
في دورته الـ24،للمرة الأولى، ويشاركه الديفا سميرة سعيد، ويكون هذا الحفل استعدادًا
لطرح ألبومه الجديد في 9 نوفمبر المقبل، و"للفجر الفني"هذا الحوار:
كلمنا عن مشاركتك الأولى في مهرجان الموسيقي
العربيه؟
طبعًا دي أول مره، أشارك في المهرجان وأكيد
حاجه مختلفه بالنسبالي و بالنسبة لفرقتي كلها، كلنا مبسوطين بالفكره، وتجربة جديدة
بالنسبالي، أنا بقالي 8 سنين من بدايتي فالغنا بغني في المدارس و الجامعات و الحفلات
و الأفراح، لكن أول مره أغني لجمهور الأوبرا، و سعيد جدًا و دي حاجه مشرفة ليا أنا
و زمايلي طبعًا.
من الذي دعاك للمشاركة في الحفل ؟
الدكتوره جيهان مرسي، والمايسترو مصطفي
حلمي، كلموني من فترة و قالولي عاوزينك معانا في المهرجان و هيبقي اليوم الثاني مع
الفنانة سميرة سعيد، ومبسوط إن اليوم ده فيه سميره سعيد، تاريخ كبير من الأغاني الناجحة،
والنجومية الكبيرة، مبسوط أوي من اليوم ربنا يكرمنا و عملنا بروفتين إن شاء الله تطلع
حفلة حلوة.
شوفت الانتقادات اللي اتوجهت لبرومو"أجمل
ليالي عمري" من ألبومك الجديد؟
سمعت، بس والله عادي، منذ بدايتي في الغنا
و الانتقادات موجوده، مافيش حاجة جديدة حصلت، كل مابغني أو بصور حاجة بيحصل انتقادات،
فأنا بشوف دعهم يقولون يقولون فتنجح، ده مبدئي.
رامي بيتابع المواهب الجديدة؟
بتابع بس بقالي فترة مش فاضي، عشان الالبوم
بحضره، و كنت بصور الفيديو كليب، ولسه جاي من دبي، و عندي حفلة الأوبرا، فمشغول في
أكتر من حاجة، The Voice
عارف إنه شغال، لكن أنا بحب المواهب الجديدة، لأني طبعا كنت واحد
منهم.
لو تم اختيارك كعضو في برامج اكتشاف المواهب
هتوافق؟
حسب البرنامج عامل إزاي، لو لديه هدف حقيقي،
ويتبني قضية الشباب اللي بتغني واللي مش لاقيه حد ينتج ليهم، أنا بالنسبالي أول واحد
هشارك فيها.
تتمني ايه في 2016؟
أتمني تبقي مصر بلد متحضرة أكتر من كده،
وموضوع الفيسبوك بيضايقني أوي، كل يوم يطلع موضوع و الناس بتمسكه وتتكلم فيه، عاوز
الناس تركز في الشغل أكتر من كده و في الإنتاج، تعمل حاجة جديدة في حياتها، لما بسافر
بره بتضايق بصراحة لإن الناس بره بتشتغل، و فيه إبداع و فيه إنتاج، لكن هنا واقفه زي
ما هي.
متابع موضوع ريهام سعيد و فتاة"المول"؟
ريهام طبعاً غلطانة، إنها تخش علي تليفون
بنت وتاخد صورها وتحطها، عيب دي أخلاق مش متعودين عليها، هي غلطت و ربنا يسامحها بقي.
كلمنا عن حفلاتك في رأس السنة؟
في حفلات بره و هنا في مصر، بس لسه مستقرتش،
هقول في أخر شهر11.
