أكرم حسنى لـ"الفجر الفنى": أنا واحد من جمهور باسم يوسف
أكرم حسنى، إعلامي نجح في أعماله بالأسلوب الكوميدي الساخر الذي يستخدمه كوسيلة لإلقاء الضوء على ما يحدث في المجتمع المصري من فساد في النظام السياسي والمالي، لاسيما فساد السلوكيات في الشارع المصري، فهو يتكلم بلسان المصريين عن رغيف العيش والبطالة وغيرها من الأحداث التي تلمس الواقع، وكان لـ"الفجر الفنى" معه هذا الحوار معه للكشف عن برنامجه فى "نجوم إف إم" للسنة الجديدة، والرد على الهجوم عليه بانتقاده للتليفزيون المصرى، وحقيقة تقليده لبرنامج باسم يوسف.
فى البداية.. ماذا عن برنامجك فى
"نجوم إف إم" فى 2016؟
برنامج "للرجال فقط" أنا وكريم
الحميدى، وليست التجربة الأولى ولكن أرى أن هناك كيميا بيننا، وبنعرف ندير حوار سوا،
وبنلعب قط وفار وبنعمل خناقة بالاتفاق نشاكس بعض على الهوا يمكن الموسمين اللى فاتوا
بنتكلم على مواضيع اجتماعية عادية هذه السنة قررنا ندرس مشاكل الراجل والست بس من منطلق
ذكورى وفى فنانة هنستضيفها هتعرض مشاكلها مع الراجل.
هل تخشى من ردود أفعال المرأة حول الاسم؟
أنا أرى أن اسمه مستفز لان فى فضول الاسم
مستفز للستات، ودائما الممنوع مرغوب.
ما رأيك فى تجربة "نجوم إف إم tv"؟
تجربة لطيفة، ونجوم إف إم الإذاعة الأولى
الخاصة، وحققت نجاح كبير هى أول إذاعة تعمل اونلاين على الأنترنت وأخذت الخطوة تى فى
بشوفها إضافة احنا مش تليفزيون مبنعتبرش ان نجوم اف ام تليفزيون بالمعنى التقليدى لو
فتحت اى قناة مش هتشوف الكواليس اللى بينا على الهوا هزارنا، ونجاحها او عدم نجاحها
من الأرقام ولكنها تجربة مختلفة.
هل "نجوم إف إم" تقوم باكتشاف
المواهب الجديدة وتتبناها؟
ليها دور بنطلع مواهب جديدة من أول الإذاعات
اللى بتتبنى المواهب هى البوابة اللى بتعدى منها الجمهور وكان عندنا برامج مواهب، وفى
مواهب كتير حاليا نجوم.
ما رأيك فى برامج المواهب الغنائية؟
عندى إحساس ان من كتر ما البرامج كترت بقى
النجم اللى بيطلع من البرنامج مش دايما بيبقى ستار لو قيسنا فى البرنامج اخر خمس او
ست سنين مش هنلاقى حد حاليا ستار لازم المؤسسة تشتغل على حاجات كتيرة، الفنان مش صوت
بس كمان طريقة ظهور، واختيار.
ماهى أكثر موهبة أقنعتك من برامج المواهب؟
فى مواهب كتير، مثلا كارمن سليمان أراها
بنت صغيرة ولطيفة وعندها الموهبة اللى تخليها فنانة شاطرة بس محتاجين المؤسسات اللى
تتبنى المواهب ديه.
لماذا اختفت فكرة فيلم "أبو حفيظة"؟
الموضوع من 4سنين، وأنا قبل اى خطوة جديدة
بيبقى عندى شئ تخوف بقلق عشان اعمل أحسن ماعندى فانجح وانى انقل تجربة ابو حفيظة على
طريقة فيلم صعبة، والبرنامج اللى بعمله صعوبته متمثلة بنشتغل كل يوم من 12الى 16ساعة
بنصور يومين فى الأسبوع و4ايام كتابة ده تحدى لوحده.
هل قمت بدراسة كورسات تمثيل من قبل؟
أخذت كورسات بعد عامين من أبوحفيظة حضرت
مع مروة جبريل، وممكن أخد تانى بس برايفت يعنى لو داخل اعمل دور بنرسم للدور حياة فممكن
قبل الفيلم.
هل ترى فرق جديد فى الموسم الجديد من
"أسعد الله مسائكم"؟
حاسس بفرق كبير من الموسم اللى فات مفيش
شك ان كل مابنشتغل بيحصل عملية نضج وتصحيح الأخطاء، دائما بسمع من الناس بدأنا نشتغل
على الأخطاء وبنصلحها، كنا بنستضيف الفنان نسأله الموسم ده قولنا ليه مبيشاركناش فى
التمثيل وخلينا الضيف جزء من الحكاية بنطور من العملية وبنخليه يجود.
ماردك على بعض الاتهامات أن "أسعد
الله مسائكم" نسخة تقليدية من برنامج "البرنامج" لباسم يوسف؟
أعذر الناس يمكن من البداية مهيئة ان الناس
تعتقد ده التوقيت، ولكن يوم وقعت مع ام بى سى كان باسم موجود وعلى الخريطة وديه المفاجئة
اللى ناس كتير متعرفهاش حتى كنا بنختار اليوم احنا يوم السبت وباسم يوم الجمعة بس بعد
ما اشتغلنا أكيد ظهر إننا مختلفين فى كل حاجة وقماشة تانية خالص، ولكن باسم ليه كاريزما
وليه جمهور وأنا واحد منهم.
من هو صاحب صوت أغانى "أسعد الله مسائكم"؟
الصوت مطرب عبقرى موهوب اسمه عماد كمال،
اكتر الشخصيات اللى عنده موهبة وبيتعب اوى هو اللى بيعمل كل الأغانى وأنا كل مابيبقى
فى فرصة بوضح ده مش من حقى انى اخده فى حد بيتعب وبيبذل مجهود وعبقرية عماد يلون صوته
على حسب المطرب ومرة أغنية "الحلم العربى" كان عندنا أصوات كتير هو اللى
عمل الأصوات، هو موهوب وعبقرى وانا متحمس ليه وبحاول لوهنعمل أغنية تتر ناخد عماد.
مارأيك فى هجومك على انتقادك للتليفزيون
المصرى؟
متقبل هذا الانتقاد أنا مش منزه عن الخطأ،
ومش كل انتقاد بتاخديه وتنفذيه لو فى وجهة نظر موضوعية اسمعها وأغير، ومش من حقك تقولى
متنتقدش التليفزيون المصرى كده لأنه مؤسسة من مؤسسات الدولة اللى لو أنا واحد غيور
على بلدى يهمنى انه يكون أحسن تليفزيون، والناس اللى استوعبت انى بنتقد عشان اهدم عندهم
نظرة سلبية أنا واحد من الناس اللى اتربوا على التليفزيون المصرى مكنش فى غير قناتين
الأولى والثانية فأنا اكتر واحد مهتم انه يبقى أحسن تليفزيون بعد الزوبعة اللى حصلت
هنلاقى وفد من الرئاسة ذهب إلى ماسبيرو، وان فى برنامج التوك الشو هيجمع عدد من الإعلاميين.
هل ترى أن هناك ميثاق إعلامى يعمل به
الإعلاميين حاليا؟
لا وان كنا محتاجين ده لان الموضوع بقى
يحكمه حاجات كتير اوى مفيش سيستم يشتغل عليه مفيش احترافية فى مذيعين محترفين بس فى
حالة من العشوائية.
ما رأيك فى جملة "الواسطة أساس الإعلام"؟
أى حاجة فيها موهبة لايوجد بها واسطة، الواسطة
هتدخلك المجال بس لايمكن أن تحبب الناس فيك ولايمكن أن تكون أساس نجاحك.
ما أفضل وأصعب موقف بالنسبة لك فى 2015؟
أفضل موقف حصولنا على أفضل برنامج كوميدى
فى "الدير جيست" للمرة الثانية لأن التكريم حاجة بترفع معنويات الواحد، وأصعب
حاجة العمل فى البرنامج لأن المشهد اللى بيتعرض ممكن نصوره 20 ساعة.
لمن توجه كلمة شكر وكلمة اعتذار؟
كلمة شكر لمراتى وأهلي أنهم مستحملين غيابى
وانشغالي فى الشغل، وممكن اعتذر للناس العاملين فى ماسبيرو مش القيادات اللى فهموا
إنى بستهون بيهم وبقلل من قيمتهم بس لما أتكلمت فى ده كنت خايف على التليفزيون المصرى.
كلمة للجمهور فى 2016؟
انتم السبب فى اى حاجة بتحصل لان الجمهور
مؤشر فكل ما بتابع ردود الأفعال بفرح وبنشتغل للأفضل بشكر واحد واحد ويارب دائما أكون
عند حسن ظنكم.
