أحيانا نرضى بالإغتصاب !

عندي مشكلة خطيرة ولا املك البت فيها وحدي وارجو المساعدة من جميع القراء وشكرا ,

انا كاتب كتابي من فترة والمفروض الدخلة كانت من ٣ ايام لكن بعد ما اعترفت مراتي باللي هحكيه حالا اضطريت لتاجيل الدخلة .. قبل ما احكي المشكلة احب اقول ان مراتي اخلاقها فوق الممتازة وثقتي فيها بلا حدود وهية فعلا طول الوقت ردود افعالها بتخليها عندي محل للثقة دي .. لكن في الفترة الأخيرة لاحظت انها متوترة جدا بشكل غير عادي وعلى غير طبيعتها وكذا مرة اقولها مالك تتردد في الكلام وتقولي مسيرك هتعرف ومسيري هقولك وفي يوم اتفقت معايا على معاد برة البيت وفعلا رحنا قعدنا في مكان عام وصدمتني بحقيقة انها اتعرضت للإغتصاب من حوالي سنة في حادث خطف لما كانت راكبة تاكسي اثناء مشوار كانت رايحاه ومن خوفها من اهلها ومني قررت تقفل الموضوع وما تبلغش كمان الشرطة عشان تاخد حقها ولولا موضوع الدخلة يمكن كانت قفلت على الموضوع مدى الحياة وقالتلي انها عايشة الجحيم بعينه لانها حادثة مش هينة على أي بنت وان الموضوع مش بسيط وهية النهاردة بتخيرني ما بين اني اسيبها بأي حجة قدام اهلنا وما بين اسامحها مع انها مش غلطانة واكمل معاها حياتنا .. انا عارف انها ملهاش ذنب وثقتي فيها زي ما قلت في اول رسالتي ملهاش حدود وبين نانرين .. بين التسامح لانها اتظلمت وواجبي اني استر عليها وارحمها من الإحساس القاسي اللي هية عايشاه وبين نار إحساس الراجل الشرقي اللي مش مستحمل ان فيه راجل تاني دخل على مراته غيره .. الإحساس دة هيقضي علية بجد وانا كمان دلوقتي قدام مصيبة اتانية وهية الأهل اللي مش عارفين انا مأجل الدخلة ليه عمال اقول اي حجج فارغة والحجج بتخلص مني والوقت بيجري ارجوكم ساعدوني وشوروا علية اثابكم الله كل الخير والسلام عليكم ورحمة الله .. اخوكم محمد سعداوي .

فضفضة

محررة الصفحة .. نيفين حجازي

في رأيي يا استاذ محمد ان تتخلص سريعا من إحساس الرجل الشرقي فثواب الستر عظيم عند الله خاصة وانك تثق بزوجتك كما قلت برسالتك وانها تستحق هذه الثقة .