اول مركز يوجا في مصر للطفل !

أطفالكم الصغيرين أكيد مش هيمانعوا إنهم يمرنوا أجسامهم الصغيرة أو يعملوا وضعيات اليوجا المختلفة لأن الأطفال من كام إسبوع لحد السنين الأولى في حياتهم هم كمان ممكن يستمتعوا باليوجا وبالتدليك والتمدد اللي بتقدمه اليوجا.

مركز فلو الصحي موجود في منطقة هادية جدا في مصر الجديدة، عجبنا قوي قد إيه المكان هادي ونضيف ولا كأنه معقم وكان في كمان أماكن مخصصة للقراية والإسترخاء قبل ما الحصة تبدأ. المكان والجو كان هادي جدا يخليكي تسترخي وتحسي إنك مرتاحة.

أكيد سألتي نفسك الفكرة ورا فلو جت منين، أقولك: الفكرة جت من تلات أمهات عايشين في مصر وماكنوش عارفين يودّوا أطفالهم أو يروحوا معاهم فين غير المول أو النادي فقرروا إنهم محتاجين حاجة تريّح أعصابهم وكمان تقربهم من أولادهم. جايمي ([email protected]),  مريم ([email protected]) و رانيا ([email protected]) قرروا إنهم عايزين يعملوا بيئة سعيدة ومريحة للأمهات الصغيرين وأطفالهم. لما إتكلمنا معاهم شرحوا لنا قد إيه هم التلاتة بيحبوا اللي بيعملوه وإنهم معاهم شهادات من يوجا ألاينز ومنظمة برايت لايت.

جايمي شرحتلنا إزاي يوجا البيبي معروف إنها بتساعد الأم والطفل إنهم يتواصلوا مع بعض في مكان وبيئة خالية من الضغوطات وكمان هادية ومش بس كدة  ده كمان يوجا البيبي بتساعد الأطفال ينموا قدراتهم الحركية وتقلل من عصبيتهم أو نرفزتهم شوية وتساعد الأم تتواصل أكتر عاطفيا مع طفلها وكل اللي حواليها. وكمان لأن الأمهات بيمروا بأوقات صعبة وقت الحمل فلو سنتر بيساعدهم يتواصلوا مع بعض ويشاركوا خبراتهم وقصصهم. من التحديات اللي فلو بتساعد فيها كمان إنها تنشر التوعية بأهمية التواصل بين الأم وطفلها وقد إيه حصص اليوجا ممكن تساعد في تطوير علاقة صحية ومتوازنة بينهم.

في حصص مختلفة في فلو للأعمار والفئات العمرية المختلفة زي:

مساج الرضيع: للأمهات اللي معاهم أطفال من سن أربع أسابيع لحد 6 شهور.

مساج البيبي: للأطفال من سن تلات شهور لسنة.

يوجا للأطفال : للأطفال الصغيريين من 18 شهر لأربع سنين.

وغيرهم كتير!

الخبر الحلو بقى إن فلو كمان بتقدم حصص للأمهات اللي عايزين يحافظوا على جسمهم خلال فترة الحمل وكمان اللي عايزين يتخلصوا من وزن الحمل.

ولأن دى حاجه جديده ومختلفه في مصر معظم المشتركين في فلوسنتر كانوا أجانب لكن جايمي شايفة إن فيه مصريات أكتر بدأوا يفهموا فكرة فلو. و كمان بيعملوا ورش عمل مختلفة زي ورشة عمل” امان” اللي بتعلم البنات من سن 5-12 سنة إزاي يواجهو التحرش وإيه اللي ممكن يعملوه فى مواقف التحرش الجنسى.

لكل الحوامل والأمهات الصغيرين فلو ويلنس سنترهو المكان الهادي والمحترف اللي هيساعدمم توثقوا علاقتكم ويتواصلوا مع أطفالكم، وتفضلوا محافظين على جسمكم وكمان تكونوا صداقات جديدة.