خيراً تعمل شراً تلقى.. فتاة تتنازل عن الشبكة من أجل "الانتريه".. ورواد السوشيال: "اللي يجي رخيص بيروح بسرعة"

في موقف أرادت به خيراً أقدمت فتاة على التنازل عن الشبكة التي وجدتها هي وخطيبها بـ "8000 جنيه" لتشتري ما ينفعهما في بناء بيتهما وهو "الانتريه"، لتبقي حديث مواقع التواصل الاجتماعي خلال الساعات الماضية.

واستبدلت العروس الشبكة بآخري من "الدهب الصيني" رخيصة الثمن تكلفت 100 جنيه فقط.

وتنوعت ردود فعل رواد مواقع التواصل الاجتماعي بين مؤيد لموقفها معتبراً أنه جاء لتخفيف الأعباء عن خطيبها، وبين رافض معتبراً ضرورة أن يتعب الشاب في الوصول إلى الفتاة حتى يصونها.

بدأ النقاش من تدويته على موقع التواصل الاجتماعي "فيسبوك" جاء فيها: " امبارح واحد صاحبى راح يجيب هو وخطيبته ( دبله وخاتم ومحبس )لقوهم ب8000 جنيه خطيبته شدته من ايدة ومرضيتش تخليه يجبهم وراحت اشترتهم صينى ب 100 جنيه وراحوا اشتروا بدل الدهب انتريه وصاحبى كان فرحان بموقفها اوووى هى دى البنت اللى تاخدها وانته مغمض وتطمن على نفسك معاها ".

قال عادل تعليقاً على موقف العروس: "انا اتجوزت اصلا من غير ما أجيب شبكة لمراتى ورفضت فرح الخطوبة والشبكة وخلصت الشقة والتشطيب بفلوس الفرح والشبكة واتجوزت فى 6 شهور ومعى حاليا 3 أولاد الحمد لله رب العالمين".

وكان لصباح وجهة نظر مختلفة فقالت: " بعد شوية لو اتخانقوا حيقولها ده انتي كنتي حتموتي علي الجواز لدرجة انك جبتي بدل الدهب انتريه.....الندالة عند الرجل المصري طبع ياسيد".

وتحدث أحمد عن زوجته قائلاً: " وفرت عليا ورفضت أجيب شبكة وما طلبتش الخشب يبقى من دمياط ولا طلبت كتالوج تختار وقالت اللى تقدر عليه والشقة ايجار ووافقت ومفيش عربية ، وبعد الجواز اشترينا شقة وجيبنا العربية وبقى عندنا أرض وهنبنى فيها بيت لينا ولأولادنا ان شاء الله وهفضل شايلها فى عينيا".

وتحدثت شيماء عن ضرورة تقددير الرجل لمواقف خطيبته أو زوجته فيما بعد قائلة: " كلام جميل بس اتمني انه يقدرها ويحافظ عليها لان للاسف في معظم الرجالة الاول بيبقو فرحانين اوي ويحمدو ربنا علي النعمة دي وبعد كدة بيبتدو يتلككو علي اي شئ وياخدو بعد كدة الموقف ده علي اساس ان الواحدة فينا عملت كدة عشان مستعجلة علي الجواز او عايزة تخلص وتتجوز وفي كمان رجالة مرضي نفسيين بتفتكرو الواحدة فيها عيب او مرض وعلي فكرة الكلام اللي بقولو عن تجربة الصح فعلا هو ان الواحدة تطمن اكتر وتثق في الراجل اللي هيتجوزها منكرش ان ده صعب لان الموضوع بيتكشف اكتر بعد الجواز اهم شئ ان الطرفين يكونو بيتقو الله في بعض ومافيش حد فيهم عنده حتة الخبث ووقت سعتها هيمشي بيهم الحال وربنا هيفرجها عليهم حتي لو في صعاب قدامهم ".

ورأت سارة أن الشاب لابد أن يتعب في تأسيس البيت قائلة: " لا مش هعمل كده عشان دا حصل قريب من كده مع أختى وف الاخر رماها عشان بابا مش اتفق معاه وقاله ال تقدر عليه ، لكن بعد كده لازم الشاب يتفرم ويعرف يعنى اى ياسس بيت وياخد بنت ناس يحافظ عليها ،، وسبحان الله لو أخته ف نفس الموقف هيقول لا واستحالة يعملو مع العريس كده".

واستنكرت ايمان من موقفها قائلة: " صيني !! اللي بييجي رخيص بيروح رخيص عالاقل كان جبلها دبله  دهب و قدرها و جاب بالباقي حاجات للبيت لكن كده غلط و كانت هي فرحت بموقفه بردو و بقت هي دي الرجاله اللي بتقدر".