حتى لا يكون "الطلاق" مصيرك.. أقوى 10 كبسولات سحرية للفوز بقلب زوجك
"حياة زوجية هادئة وسعيدة".. حلم يراود كل فتاة قبل زواجها بأن تنتقل إلى عش الزوجية لتعيش حياة مليئة بالحب وتكوين أسرة سعيدة، ولكن التجارب أثبتت أن الحياة بعد الزوج تختلف تمامًا عما تحلم به الفتيات، لوجود واقع مختلف عن إحلامهن بالإضافة إلى مواجهة بعض الضغوط التي تقابلهن.
"الفجر" رصدت عدد من التجارب الحية لبعض السيدات المتزوجات، لتقديم عدد من الكبسولات السحرية للفتيات حتى تهنأن بحياة زوجية سعيدة والفوز بقلوب أزواجهن.
-الكبسولة الأولى.. البعد عن "النكد"
في البداية تقول سارة محمود- متزوجة منذ 15 عام- إن البعد عن "النكد"، هو أساس الحفاظ على الزوج واستقرار الحياة الزوجية، قائلة: "علشان أي ست تحافظ على جوزها لازم تبعد عن النكد، وتكون دمها خفيف، لأن النكد بيهدم أي علاقة وبيخنق الطرفين، ولو الست دمها خفيف وبتعدي المشاكل بروح حلوة مفيش أزمة هتقدر تضايقهم طول عمرهم، ولأن مفيش بيت مصري بيخلو من المشاكل تبقى أمام كل سيدة طريقة الحل فقط هي ملجأها الوحيد للحفاظ على حياتها الزوجية وأسرتها".
- الكبسولة الثانية.. التغيير والتجديد
ورأت شيماء نصر- متزوجة منذ 9 سنوات- أن الوسيلة الوحيدة للحفاظ على الزوج، هي التغيير، قائلة: "الوسيلة الوحيدة، للحفاظ على الزوج ونيل رضائه حبه دائماً، أن تتغير الزوجة وتتحول في كل يوم إلى امرأة جديدة، و تحيط نفسها بجو متغير، فمثلاً تُبدل ديكور البيت و تفصيله .. وألوان الطعام و تقديمها وألا تعطى نفسها لزوجها للنهاية، تهرب من يده فى اللحظة التى يظن أنه استحوذ عليها، و تنام كالكتكوت فى حضنه فى اللحظة التى يظن أنه فقدها".
الكبسولة الثالثة.. الاحترام
وأوضحت مروة عبد الراضي- متزوجة منذ 6 سنوات- أن الاحترام هو أساس أي علاقة زوجية ناجحة، وقالت: "علشان نحافظ على حياتنا ومنهدمهاش لازم يكون فيه احترام، ويكون متبادل بين الطرفين".
- الكبسولة الرابعة.. التفاهم
وقالت أميمة إبراهيم- متزوجة منذ 12 عام- إن التفاهم هو الحل الوحيد للحفاظ على الزوج، متابعة: "لازم يكون في تفاهم بين الزوجين علشان الحياة الزوجية تكمل، ولو التفاهم مش موجود الحياة هتكون صعبة والمشاكل هتزيد، وممكن توصل للطلاق".
- الكبسولة الخامسة.. الاحتواء
وأضافت ندى الباشا-متزوجة منذ 8 أشهر: "خليكي طيبة واحتوي زوجك، وخليكي الحضن الحنين، ومتخليش لسانك يسبق عقلك، بس كرامتك أهم حاجة ف الدنيا خليه متأكد انه لو زعلك هيشوف ايام سودا، هى شعراية كده أي ست بتوازنها".
- الكبسولة السادسة.. القيام بالواجبات
وقالت رباب علي- متزوجة منذ 8 سنوات: "الست تقوم بواجباتها وتراعي ربنا هما دول الأسباب اللي هتحافظ على جوزها، وفي نفس الوقت لازم هو كمان يحافظ عليها علشان تقدر تقوم بواجباتها كويس".
- الكبسولة السابعة.. احساسه برجولته
وعلقت إيناس محمود- متزوجة منذ 15 عام- قائلة: "الطريقة الوحيدة للحفاظ على الزوج أو حب أي راجل إنك تحسسيه برجولته، يعني دايماً صوتك يكون واطي، تسمعي كلامه، مش كل حاجة تتناقشي فيها، تحترميه وبالذات قدام الناس، دايما حسسيه أنه راجلك".
- الكبسولة الثامنة.. المشاركة
ونوهت حنان أحمد- متزوجة منذ عامين- بأن مشاركة الزوج اهتماماته الطريقة الوحيدة للحفاظ على الزوج، فقالت: "علشان الحياة الزوجية تستمر في حب وسعادة لازم الزوجة تكون كل حاجة للزوج فتصاحبه وتشاركه اهتماماته حتى لو مبتحبهاش، تعمله الأكل اللي بيحبه، تكويله لبسه، ولو غسلتله أيده ورجله ده حب مش بيقلل منها عادي، متحسيسهوش أنه لوحده تخليه دايماً عارف أنه هي نقصاه علشان يكمل حياته فمش هيقدر يبعد عنها".
- الكبسولة التاسعة.. الضعف
أما سمر محمود- متزوجة منذ 5 أشهر- رأت أن الضعف هو الحل السحري للمتزوجات والسيدات عموماً، موضحة: "قوة المرأة في ضعفها، والطريقة الوحيدة اللي تقدري تحافظي بيها على جوزك انك تباني ضعيفة وتخليه سندك، هتصعبي عليه وهيفضل دايماً يحافظ عليكي، دموع الست وسيلتها اللي تقدر تخلي بيها الراجل يعملها المستحيل".
- الكبسولة العاشرة.. الطموح والشخصية
ومن ناحية أخرى، قالت أميرة العدوي- متزوجة منذ عام- أن طموح المرأة هو السبيل الوحيد للحفاظ على الزوج، متابعة: "كل واحدة بتدور ازاي تحافظ على جوزها لازم يبقى لها طموح وشخصية بعيدة عن حياتها معاه، ميبقاش هو بس كل همها، تطور من ذاتها بحيث انه كل ما يبص لها فى يوم ويشوفها بتطلع لقدام يعرف إن الست دى لسة فى جعبتها الكتير اللى لازم يكتشفه، وكل ست طول ماهي واقفة على رجلها ليها ابداعتها هيفضل جوزها مشدود ليها".
