رمزي بشارة يكتب: قريباً في العريش .. كنائس بلا وطن

أزمة " تهجير " أقباط العريش لم يتم احتوائها

• تسكين الناس اللي اتهجروا من بيوتهم وسابوا بلدهم واللي بيتقتلوا على هويتهم الدينية

عامل بالظبط زي واحد اتدبح من بلطجي

فالكنيسة والحكومة جابوا له الإسعاف ودخلوه المستشفى وجابوا له سكن بعيد عن البلطجي

بس البلطجي قاعد مكانه زي ماهو

وأهل وقرايب وأصحاب اللي اتدبح بعضهم خاف من البلطجي فسابوا بيوتهم ومشيوا وبعضهم لسه هناك مش قادر يسيب شغله وبيته وحاله

هل ينفع نلاقي حد عبقري يصرح بإن المشكلة انتهت !

ياقَوم .. المشكلة ابتدت

والبلطجي لو مالقاش حد يلمه هيتفرعن أكتر وهيتغَوَّل

وهيتوسع في فَرض سيطرته على البلاد اللي حواليه

لحد مايوصل للبهوات اللي نايمين على سرايرهم وبيكتبوا من تحت اللحاف وبيقولوا

المشكلة اتحلت .

" أو للهانم اللي طلعت مع المذيع بتاع الأعشاب وقالت إن مفيش تهجير "

• مسيحيين تانيين هيتقتلوا

فقط لأنهم مسيحيين

• والعريش بيفقد المسيحيين اللي عايشين فيه

• والكنايس اللي فيه هتصبح كنائس بلا وطن !

• فهل انتهت مشكلة مسيحيي العريش وتم احتوائها !

تنتهي هذه المشكلة ويتم احتوائها عندما يفرض الجيش المصري سيطرته هناك

وكذلك الشرطة .

وعندما يتم القبض على البلطجي اللي عمال يبرطع هناك " داعش وولاية سيناء وأنصار مش عارف ايه .. وغيرهم "

لقد قدمنا كنائسنا على مذبح الحب لوطننا العظيم مصر ، وقال البابا تواضروس مقولته الصادمة الخالدة

" وطن بلا كنائس أفضل من كنائس بلا وطن "

ولكننا الآن على وشك أن نرى كنائس بلا وطن .. فماذا نحنُ فاعلون !!!

• ملحوظة : هناك طريقتان لأجعلك تترك بيتك بل وبلدك كلها وترحل

الأولى .. هى أن أُخرِجَك منها بالقوة وأطردك من ديارك مستخدماً العنف أو السلاح .

الثانية .. هى أن أقتل أحد أفراد أسرتك أو أحد أصدقائك في وضح النهار وهو في غرفة نومه أو وهو في محل عمله ، وأجعلك تشعر أن الدور القادم عليك

وأنه ليس هناك من يحميك

.. فكإني باقولك عايز تمشي وتنفد بجلدك ؟ الباب يفوت جمل

عايز تقعد وندبحك ؟ .. فأهلاً بيك في وطنك

هل مازلتم تقولون أنه ليس تهجيراً ؟!