البطران عيشته قطران

مساء الخير أستاذتنا أنا باعت مشكلتي وعارف إني غلطان ويمكن تلوميني و اصدقاء فضفضة معاكي كمان لكن فقت والله ورجعت لضميري ,

مشكلتي .. أنا كنت متجوز من سيدة فاضلة ومهذبة وبنت ناس وبعترف إني إتبطرت على نعمة ربنا .. انا كنت بسئ ليها ولاهلها المعاملة لدرجة بتهيألي إنها حست ان العيشة معايا جنان رسمي , على كل حاجة كنت بتلكك وهنتها كتير وبدون ما تغلط معايا وبجد مش عارف ليه وصل بية الحال للدرجة دي يمكن عند .. بس حتى لو عند .. هية أصلا ما كانتش بتعند معايا كانت تفضل تبصلي ودموعها في عينها من الحسرة وهية ساكتة .. انا الكلام ده ساعتها مكنش بيفرق معايا وختمتها للأسف بأني لحظة الطلاق أجبرتها بسوء معاملتي إنها تطلب الطلاق على الإبراء علشان ما أدفعش ليها حق ربنا ( المؤخر ) , إنهاردة أنا بضرب نفسي بالجزمة على ظلمي ليها ونفسي حد من رجال القانون يطلع يتناقش في بنود القانون العقيم اللي بيشارك في ظلم البشر , لأن مفيش حاجة في القانون بتاعنا تثبت مين من الأزواج اللي طلع عين التاني علشان يبان الست من حقها المؤخر ولا لأ على أساس إنها اللي طالبة الطلاق يعني .. على فكرة قبل ما أنسى انا اللي فوقني ظرف مرضي قهري ولما الدنيا فضيت من حواليا والزمن إداني أكبر قلم راجعت ضميري وللأسف أنا مش عارف أوصل لطريق طليقتي لأنها بعد موضوع طلاقنا سافرت لأهلها همة أصلا كانوا عايشين برة مصر وبييجوا من وقت للتاني حتى ياعيني همة ماترحموش من سوء معاملتي وهمة في أجازتهم في مصر وهية بنتهم الوحيدة لا أخ ولا أخت , ونفسي نفسي نفسي يكون فيه طريقة أعرف بيها مكانهم هناك والله العظيم هروح لحد عندهم وأبوس رجليهم من الأسف وأديلها حقها والموضوع ده مزود عذابي أكتر وده أكيد عقاب من عند ربنا علشان أنا إفتريت ومكنش لية كبير حتى لما والدي كان بيهزأني علشانها كنت بنهره ,, أدي والدي توفاه الله .. لا طايل يرجع علشان أقول له آسف ولا طايل دعاه ليه ولا طايل اعرف مكان الست المحترمة اللي كنت متجوزها لجل ما أرجعلها حق ربنا وقاعد لوحدي تماما حتى أصحابي بعد الموضوع ده لاموني وشبه قاطعوني لأنهم كانوا بيشوفوا أنا بعمل إيه , أستغفر الله العظيم من كل ذنب عظيم إحتسبت ربنا في كل شئ , انا بعت مشكلتي لأنها فعلا عبرة لمن لا يعتبر والراجل اللي يفكر يهين أي ست حتى لو جارته أو ملهاش علاقة بيه يا ويله من الله علشان ربنا أوصى بالنساء كتير في القرآن الكريم بس اللي يفهم , اللهم إني بلغت اللهم فاشهد .. مش عايز غير دعواتكم

حازم