قولها بصوت عالي .. بحبك
مساء الخير استاذة نيفين لعلك بخير بقالك غايبة عننا شوية يارب المانع خير
مشكلتي باختصار ان حبيبي تقيل قوي في التعبير عن مشاعره صحيح انا متاكدة انه بيحبني جدا لكن زي مانتي عارفة الست بتحب تسمع كلمات الاعجاب والغزل والحب .. وانا كمان تحديدا من النوع اللي الكلمة الحلوة تغير الكون من حوالية والحقيقة انا كلمته كتير في الموضوع دة ووعدني انه لما يحس بحاجة هيبوح بيها لكن يتعدل يومين بعدين يرجع لطبعه مرة تانية .. انا ببقي محتاجة فعلا اني اسمع مشاعره تجاهي واحب كمان لما اكون لابسة حاجة تعجبه يقولي ان الحاجة دي حلوة وجميلة لكن هوة بيكتفي بنظرة اعجاب وخلاص علي كدة .. تفتكري يا استاذة نيفين ايه حل الراجل التقيل ؟
مني الزهيري
فضفضة
محررة الصفحة .. نيفين حجازي
يا مني .. الراجل التقيل صحيح ممكن يكون معذبك لكن علي الاقل انتي ضامنة مشاعره علي حد تعبيرك .. وعموما حاولي تقللي من كلامك معاه علي الموضوع دة بالخصوص علشان مايحسش انك بتضغطي عليه ولسبب تاني كمان ان المشاعر مش محتاجة اننا نطلبها اذا ما كانتش طالعة من القلب هيبقي ملهاش لازمة صحيح انتي بتقولي انه بيحبك لكن هوة بيعبرلك عن الحب دة بطريقته الخاصة بيه .. حاولي الفترة الجاية لما تيجي تعبري له عن مشاعرك ماتستنيش رد ومع التكرار ومرور الوقت لازم هييجي موقف يضطر هوة يرد عليكي بالمثل ومع الوقت هيبدآ يتعود علي انه يرد المشاعر بكلمات فيها اللي نفسك تسمعيه .. الموضوع محتاج صبر منك وكمان انك تكوني فاهمة الاختلاف اللي بينكم ودة اللي بينجح اي علاقة وبينجو بيها الي بر الامان .. علشان لما نكون مقدرين ان البشر عمرهم ما هيشبهوا بعض هنرتاح من التفكير في حاجات تزعجنا .. بتمنالك معاه حياة سعيدة وحاولي انتي اللي تكوني تقيلة شوية .. تحياتي ليكي .
للتواصل اضغط هنـــــــــا
