تامر حسني ينصح شاب تركته حبيبته.. ويعلق:"كنت بشتغل زيك في فندق أقل عشان أنا راجل"
شارك الفنان تامر حسني، جمهوره بموقف حدث له أمس بأحد الفنادق الضخمة بالقاهرة أثناء إحيائه حفل زفاف، حيث انه وجد شاب يعمل بالفندق طلب منه أن يلتقط صورة تذكارية معه، لينشرها تامر عبر صفحته الرسمية بالفيسبوك، مشيرا إلي أن حبيبته تركته.
ولبي حسني، طلبه حيث قام بنشر الصورة عبر صفحته الرسمية بالفيسبوك، ووجه له نصيحة.
وكتب تامر:" الشاب الجميل ده شافني داخل اغني في فرح وقفني وقالي انا بشتغل تقريبًا ويتر هنا في الفندق وحبيبتي سابتني النهارده وانا زعلان اوي بس اول ماشفتك فرحت عشان بحبك جدًا وطلب مني نتصور بموبايلي وأنا اللي انزل صورته عندي عشان يفرح وقالي انا إسمي محمود".
وأضاف حسني،:" كان نفسي اتكلم معاه بس كنت داخل اغني المهم يا محمود يا جميل بما اني معرفش ايه الأسباب اللي بعدتكوا عن بعض وبما اني مش ناسي الحزن اللي كان في عنيك هكلمك هنا اكيد الدنيا مش هتقف بيك اهم حاجه تفضل تشتغل زي مانت كدا راجل وسيد الرجاله وربنا ان شاء الله يصلحلك الحال وممكن ترجعوا او هيكرمك بإنسانه مناسبه ليك اكتر وخلي الخير بينكم حتى في الإنفصال جايز قربكم مش خير لبعض ربنا يكتبلك الصالح ويكتبلها الصالح".
وتابع:" اهم حاجه هوصيك بيها اشتغل وإكبر وإنجح وطور من نفسك، مين عارف جايز بعد سنين ربنا يجمعني بيك تاني واشوفك صاحب الفندق اوعى تضحك وتقول مستحيل شغلانتك وانا صغير اشتغلتها بس طبعًا مش في فندق شيك زي دا، كانت في مطعم أقل من بسيط وعشان راجل مايئستش فضلت ورا حلمي لحد ماوصلتله يارب توصل لحلمك انت وكل الناس".
وإختتم حسني، كلامه قائلا:" وآدي صورتك يا عم منوره عندي اهي متأكد ان كلامي إشاره ليك مهمه خليك شاطر وإفهم الإشاره".
و أحيا تامر مؤخر حفل من أقوي حفلات الصيف فى مدينة العلمين الجديدة، وقد كان هذا الحفل احتفالا بمرور 15 سنة على طرح أول ألبوم غنائي له.
وقام تامر حسني فى حفله بمدينة العلمين، بتخليد ذكري الفنان الراحل عزت أبو عوف، عن طريق وضع صور له على شاشات المسرح وتحدث عن فضله الكبير عليه، وأنه كان بمثابه الأب الروحي له.
وقام تامر مؤخرا بتوجيه رسالة لجمهوره ومتابعيه عبر حسابه الشخصي على موقع "إنستجرام".
وعلق تامر قائلا: "يا جماعة أنا بشوف تعليقاتكم على قد ما بقدر، وكل حد فيكم بيكتبلي قد إيه هو بيحبني، والله ببتسم وبدعيله في سري، وربنا عالم بكدا، وببقى نفسي أدخل أرد على كل الناس، بس لو رديت على حد الباقي هيزعل وما شاء الله عددنا هنا كبير، بس أنا واثق انكم عارفين، إنتوا إيه عندي، عشان محبتكم دي، مكنتش هتبقى بالقوة دي إلا لو من جواكم متأكدين إني بحبكم وبتمنالكم الخير كأحد أفراد أسرتي، شكرًا على كل كلامكم ودعمكم، ألف شكر يا أغلى الناس".
ويستعد الفنان تامر حسني، مساء اليوم لإحياء حفلًا غنائيًا كبيرًا في استاد القاهرة الدولي ويقدم تامر في الحفل باقة من أجمل أغانيه القديمة والحديثة.
