مواصفات الهوانم
انا راجل بحب الستات وبحب كل ست جميلة ومهندمة وشيك ومن كتر ما انا موسوس اتاخرت في الجواز لكن للاسف زن الام علية خلاني اضطر للجواز وبالرغم من كدة حاولت علي قد ما اقدر انتقي البنت اللي هتجوزها .. الشكل العام .. الهندام .. الرقي .. طريقة الكلام ..النضافة الشخصية .. اختيارها للبسها مناسب ولا لا .. يعني تفاصيل كتير لكن انا بحب الست الهانم .. للاسف اتجوزت ووالدتي علشان كانت مستعجلة فاضطريت امشي الموضوع من غير ما اخلص الفحص بتاعي عليها .. الصراحة هية كويسة جدا لكن بعد الجواز اكتشفت شوية تفاصيل مش عاجباني خالص كلمت فيها امي قالتلي انت مش وش نعمة البنت مافيهاش غلطة جمال وعيلة وتعليم وفي شغلها اسمها كبير وناجحة واهلها ناس طيبين ..مالك يابني انت وش فقر واذا ضايقتها انا اللي هقف قدامك وهبقي في صفها .. دة كان رآي امي اما والدي فقالي تقريبا نفس الكلام واكتر وهزآني بصراحة .. يا جماعة محدش فاهمني انا محتاج ست واجهة راقية تعرف تتكلم في كل المواقف زي زوجات السفراء بالظيط علشان تشرفني واتباهي بيها .. هوة مش وخلاص يعني اشمعنا انا واخد بالي من تفاصيل التفاصيل اووووف حاجة تقرف .. ياريت الله يخليكي يا استاذة نيفين تشوفيلي حل
احمد مسلمي
فضفضة
محررة الصفحة .. نيفين حجازي
استاذ احمد حضرتك مش شايف انك مزودها حبتين .. لما البنت مافيهاش غلطة واكيد والدتك مش هترضالك باي حد .. يبقي مالك فيه ايه .. بعدين الاهم من تفاصيل الزوجة حاجات كتير جدا غير اللي سيادتك ذكرتها صحيح دة مهم لكن فيه امور كتيرة اكتر اهمية من احلانك الوردية .. بعدين ازاي انا مش فاهمة .. هامك جدا الناس ومش هامك معاملتها معاك مثلا ! هوة انت متجوز عشان تبقي مراتك زي العربية تتمنظر بيها قدام الناس .. عيب والله يا استاذي .. انت راجل اكيد ناضج ولك تجارب وخبرات متراكمة مش معقول ما اتعلمتش من كل دة حاجة !! كل المظاهر دي ممكن تروح بمجرد ما لا قدر الله يصيبك مكروه في دخلك وتبقي مراتك مش قادرة تشتري مكملات الشكل والمظهر انما اصل الانسان هوة اللي بيبقي موجود تحت اي ظرف ودة المهم .. ارجوك حاول تراجع التفكير وتصحح مفاهيمك قبل ما تفقد زوجة ممتازة وترجع تندم او تعيش لواحدك الباقي من عمرك
