ابويا بينحش في عرضي

القسوة يا استاذة نيفين ليها ناسها ولا دي تركيبة مريضة محتاجة علاج؟ عفوا علي اني بدات مشكلتي بسؤال لكن .. انا تعبانة جدا من ابويا والمصيبة انه ابويا .. بين نار انه الاب ونار الحريقة اللي جوايا ونفسي افش غلي بقي .. اهانة .. تلميحات في تهم في عرض .. التلصص بكل انواعه .. الكلام في حق سمعتي مع افراد العيلة .. اتهامي باني مش في شغلي .. رايحة فين .. اكيد انتي كدابة .. طيب هكدب ليه .. هوة كدة .. المهم .. بابا انا محتاجة فلوس تعبانه ومرتبي خلص ومحتاجة اروح اكشف .. نظرة حقيرة من اب مريض .. بصة روحي شوفي بتجيبي فلوسك منين .. اه علي وجع القلب اه .. والمشكلة ان مليش حد في العيلة مصدر ثقة او عون لية لان الكل في بيته بيحل مشاكل ولاده مش بلومهم بس النتيجة في الاخر اني مليش حد .. الراجل دة اللي هوة ابويا غاوي شغالات وغاوي يعمل ديون وغاوي يعاملني علي اني السبب في الطلاق بينه وبين امي .. امي ست مفيش منها اتنين هتقولي ليه مش بروح اعيش معاها .. حصل لكن المصايب اللي عملها ابويا بسبب قعدته في البيت لواحده شوهت سمعتنا اكتر فاضطريت ارجع تاني الحق اللي فاضل منها .. انا دلوقتي بعاني مر المعاناة من حالتي النفسية والعضوية طبعا من كتر القهر .. ابويا قهرني حقيقي .. ولغاية دلوقتي بحاول اكون الابنة البارة لكن من غير اي فايدة .. حسبي الله ونعم الوكيل