إعلامي عن تكريم حمو بيكا: "على الدنيا السلام"
أعرب الإعلامي أشرف شرف الدين، عن استيائه الشديد من تكريم مغني المهرجانات حمو بيكا وإهدائه سيف من الذهب في المملكة العربية السعودية، بالإضافة إلى هدايا سيارات بملايين الجنيهات قائلا: "على الدنيا السلام لما تلاقي حمو بيكا بيغني شقلطوني في بحر بيرة يبقى على الدنيا السلام".
وأضاف "شرف الدين" خلال تقديم برنامجه "حوار الخميس"، المذاع على قناة "الحدث اليوم"، مساء اليوم الخميس: "بعد كل الإنجازات التي نراها وبعد كل شىء جميل يحدث الآن في الدولة المصرية، نلاقي مطرب مهرجانات بيغنى وأشرب خمور وحشيش وبياخد هدايا دهب وسيارات بالملايين الجنيهات.. وهناك استضافات لهؤلاء المطربين على الفضائيات العربية والدنيا تقوم وتقعد بيقى على الدنيا السلام".
وتابع: "هناك احتفاءات من الناس بمطرب مهرجانات كل اللي عمله أنه غنى أغنية من كلمة واحدة وبينادي فيها على بطة يبقى على الدنيا السلام"، قائلا: "هتقدر تقنع ابنك وبنتك أن الاحترام والاجتهاد والتعليم ده طريق النجاح إزاي وهتقدر تزرع فيهم القيم والمباديء إزاي وهو يرى إن التخلي عنها سهل جدا وبيوصل إلى النجاح والمجد والمال".
وأكمل: "هتقدر تقنع أبناءك إزاى إن التفاهة والإسفاف مش أقصر طريق لتحقيق الشهرة والنجاح فى الزمن اللى احنا فيه.. وهتقدر تكمل فى الطريق اللي أنت فيه من تعليم ومبادىء وفاكر إنها ستوصلك لحلمك إزاي.. المقاييس كلها اتغيرت وكل اللى بتعمله نفخ فى قربة مخرومة وهتغير إزاي أنك تغير جلدك وتستسهل الطريق علشان ترضي طموحك.. أسئلة صعبة وفتنة شديدة ولا يسعنا إلا أن ندعي ربنا يارب نجي الأجيال اللى جاية من الوقوع في فخ الفتنة".
