نقيب الموسيقيين عن السماح لمطربي الراب بالعمل: "مش هحاسب حد عايز يغدي النونة لكن همنع الكلام الخارج"

تحدث الفنان هاني شاكر نقيب الموسيقيين في برنامج “حبر سري”، الذي تقدمه الإعلامية أسما إبراهيم، عبر قناة "القاهرة والناس" عن أزمة منعه لمطربي المهرجانات الشعبية، مقابل السماح لمطربي الراب بالعمل.

وقال هاني شاكر: "الراب فن جديد شبابي أنا واحد من الناس مبفهموش ومبسمعهوش، مش معنى كده إني أرفضه أو مشجعش مغنيه، ومعنديش فكرة عن الراب والتراب". 

كما علق على أغنية" مش فير" لويجز:"من كام سنة؟ متجبليش أغاني من سنتين تلاتة، ويجز مبقالوش 6 أو 7 شهور في النقابة، ولو الكلام ده في حاجة خارجة هيتوقف، هشوف كلام الأغنية كله مكتوب الأول، ولو طلع فيها كلام خارج هيترفض وهننذر ولو اتكرر هيتوقف".

وأكد على أنه لم يسمح لمغنيين الراب بالعمل بسبب حب عائلته لهذا النوع من الاغاني قائلًا:" مش عائلتي أنا قولت ابني ومراته راحوا حفلة لويجز، وابني مقاليش إنه شاف حاجة خارجة، والكلام اللي اتقال مش ده اللي بنقيس عليه، هل بتقيسي ده باللي قاله حسن شاكوش على المسرح؟". 

واختتم حديثه قائلًا: "أنا اللي يهمني هو بيغني صح ومفيش نشاز، هو في كلام هايف ومعرفش إزاي الشباب بيربطوا كلام الراب ببعضه، واللي يهمني أن ميكونش في كلام خارج وأنه يكون بيسف، أنا مش هحاسب أنه عايز يأكل النونة، ولكن هحاسب اللي عايز يقول كلام خارج، وأنا مقدرش أمنع اللون ده ولكن أقدر أمنع اللي مش عضو في نقابة، مقدرش أتحكم في الذوق العام، وأوضح إن في إيد بتزق ناس للسكة دي بفعل فاعل، في ناس عايزة ده وعايزة تشوف المصريين كده، إحنا ادينا الفرصة للناس دي بسبب أننا مبقيناش نعمل حفلات زي الأول".