سمير فكري يروي أصعب المواقف التي واجهت الداخلية في مشوار الصعود وطموحه بالدوري الممتاز

يعد سمير فكري هداف الداخلية من أبرز لاعبي المجموعة الثانية مجموعة القاهرة بدوري القسم الثاني ويعتمد عليه المدير الفني دائما بشكل واضح ويكون من الاعمدة الاساسية داخل كتيبة الداخلية.

وفي حوار خاص مع الفجر الرياضي تحدث عن مشوار الصعود للممتاز وأبرز العقبات التي واجهت الفريق.

هل توقعت صعود الداخلية للممتاز هذا الموسم؟

بالتأكيد كان عندي يقين بالله أن بعد تعب موسمين ربنا هيكرمنا ومعانا مدير فني كبير دائما بيتكلم معانا في ان الفريق لازم يحسم الدوري قبل نهابة الموسم ب4 مباريات.

ماهى أصعب مباراة خلال الموسم الحالي؟

حتي الان مباراة القناة في الدور الأول اتأجلت لمدة يوم وكان فريق زد بينافس علي الدوري والفرق بينا 5 نقاط ولعب وكسب بقا فارق بينا 8 نقاط وكان عندنا حماس إن الفريق الازم يكسب المباراة دي عشان نقلص الفارق بينا وبالفعل فضل 5 نقاط واشتغلنا علي ده لحد متصدارنا الدوري والحمد الله تمت بنجاح والداخلية في الممتاز.

ماهي تعليمات كابتن سيد عيد ليك في كل مباراة خلال الموسم الحالي؟

كابتن سيد كل تعليماتة للفريق لازم نلعب علي الجول وأن لازم نحسم الدوري من بدري للصعود، ودائما بيجدد الثقة فيا وإن اي فرصة تيجى اترجمها لهدف ونلعب دون ضغوط ونستحوذ على المباريات.

ماهي أبرز العقبات خلال مشوار للصعود هذا الموسم؟

من أصعب المواقف اللي قابلتها في مشوار الصعود ملعب زد إف سي لأنه ملعب ترتان صعب جدا ويوم مباراة النصر القاهري في الدور الثاني الارضيه صعبة جدا، غير كدا الإدارة كانت موفره كل احتياجاتنا.

كنت شايف المنافسه ازاي في مجموعة القاهرة الموسم الحالي؟

 في الحقيقة كانت منافسة صعبة جدا ومختلفة عن المواسم اللي فاتت المجموعة كلها دوري ممتاز ولكن قدرنا علي حسم الدوري قبل نهايتة بالرابع جولات وبفارق 12 نقطة.

طموحك اية مع كتيبة الداخلية للموسم القادم وهل مستمر مع الفريق؟

أنا طموحي مع الفريق كبير وأتمني الموسم القادم الداخلية تكون في المربع الذهبي وتكمل في الممتاز عشان ده مكانها الطبيعي.

ماهو موقف الإدارة ومدي الدعم للفريق خلال مشوار الصعود؟

حابب اشكرهم علي وقفهم في ضهرنا والدعم الكامل لينا طول المشوار كان عندهم ثقة كبيرة في الفريق وفي كابتن سيد عيد وكان قد الثقة دي.

من وجهة نظرك ماهو سر تميز فريق الداخلية والصعود للممتاز

السر في الروح داخل غرف الملابس مش فارق مين يلعب مين علي دكة البدلاء المهم الفوز وال3 نقاط.

من سيكون الحصان الاسود الموسم القادم ؟

الداخلية فريق كبيره وقادر يكون الحصان الأسود وفي المربع الذهبي.

وجهة كلمة للكابتن سيد عيد؟

كابتن سيد مدرب كبير وانا شرف ليا اني اتعاملت معاه حقيقي اكتسبت منه خبره وتعلمت منه كتير وهو تعب معايا ومع الفريق عشان لحظة الصعود وحابب اشكر زمايلي ومجلس الإدارة كلنا ايد واحدة وروح واحده لتحقيق لحلم وقد كان.