عمرو أديب: "اللي يتكسف من الساحل ميتمتعش فيه" (فيديو)
انتقد الإعلامي عمرو أديب، حالة الجدل المثارة مؤخرًا عبر مواقع التواصل الاجتماعي والمقارنة بين أسعار الساحل الشمالي والنظر إليه نظرة طبقية وتصنيفه إلى الساحل الطيب والساحل الشرير بسبب ارتفاع الأسعار.
اسأل الأول على الأسعار الأول
قال "أديب" خلال تقديم برنامجه "الحكاية" المذاع على فضائية "إم بي سي مصر": "أنا بسأل على الأسعار في أي محل ولو ناوي تشتري اسأل الأول على الأسعار خلاص مبقاش فيه كسوف واللي يتكسف من الساحل ميتمتعش فيه".
وأضاف "بقيت بشوف إزاي الانتقاد لأسعار حفلات الساحل وأن الترابيزة في حفلة الفلانة بـ35 ألف جنيه لو أنت عايز تروح لمزاجك روح أو واحد جاي من بره هو الموضوع كله عرض وطلب".
استخدام لموضوع الساحل طبقيًا
واستطرد "لما الراجل يبيع الحاجة أغلى من ثمنها وأنت تقوله لا وغيرك يقوله لا أكيد هينزل سعرها إنما النغمة الحالية هو إحنا ملناش نفس لو ليك نفس وعايز ادفع".
وأردف "هناك استخدام لموضوع الساحل أنه يكون موضوع طبقي، ولازم نعرف أن دي ناس عندها مستوى اقتصادي معين لما تيجي تعامل معاهم بتتعامل بالسنتي".
واستطرد "وبعدين فيه ممشى عملاه الدولة وفيه محلات بأسعار حلوة، إنما لو عايز تبقى زي الناس دي يبقى تدفع الساحل كله دوبل السعر لأن كل المحلات بتدفع دوبل الإيجار".
فاتورة الساحل الدوبل
وأردف "يعني أي محل سمك هتدفع فيه فاتورة دوبل اللي موجودة في التجمع أو 6 أكتوبر لأنه هناك عنده مصاريف نقل وإيجار فأرجوكم هدوا نفسكوا إذا كنت عايز تتسلى ده موضوع تاني".
واستكمل حديثه "هذا هو الموضوع من الناحية الاقتصادية، الناس دي أسعارها غالية لأنها بتشتغل شهرين بس ده حتى فيه مطاعم بقت بتقلب الترابيزات وتسألك هتقعد من الساعة كام لكام".
