"اليأس وإحباط المقربين".. تامر حسني يذكر معاناته ليشجع جمهوره
نشر الفنان تامر حسني أولى منشوراته التي ذكر أنه سينشر سلسلة يوضح من خلالها قصة نجاحه ليشجع جمهوره فكانت أولى منشوراته اليوم مبنيه على تعليقات الجمهور التي تركوها في المنشور السابق حيث قال: "قرآت معظم التعليقات على قد ما قدرت على آخر بوست ليا إللي فوق ده، وفهمت أكتر حاجتين من تعليقاتكم عاملين إحباط لمعظمكم، اليأس من النجاح وإحباط المقربين، وبعضكم واصل لفقدان الأمل والشغف وبعضكم فاقد الأمل في الحياة نفسها".
"كان جوايا سعي دائم" تامر حسني يشجع جمهوره لمواجهة الصعاب
وتابع منشوره بالتذكير بمعاناته في بدايته ليشجع جمهوره لإكمال مشوار نجاحهم رغم كل الصعوبات حيث قال: "هطلب طلب منكم قبل أي شئ أفتكروا معاناتي في بدايتي وظروفي الصعبة من غير أب ومن غير أي فلوس وبنزل أشتغل في الشوارع من عامل بنزينه لسوبر ماركت لفاعل يعني إللي بيبنوا العمارات بطلع طوب وأسمنت، عشان أرجع بيتي لأمي الغلبانه بأي خمسه جنيه بالإضافة لمرتب النادي لما كنت بلعب كورة كان مرتبي 22 جنيه في الشهر منهم تحويشة المياه والكهربا وعمليات أخويا عشان كان عيان لفترة كبيرة كنت بعمل المستحيل فعلًا عشان أمي وأخويا وعشان أوصل لهدفي".
"عايز أنصحها بخطه بديلة" تامر حسني يُذكر الجمهور بالخطة البديلة حتى لا يصابوا بالإحباط
وأضاف خلال منشوره ليوضح كيف يستخدم الجميع خطة بديلة حتى لا يصاب بالإحباط فقال: "كان جوايا سعي دائم لطريقين الكورة والغناء وبقول ده عشان ناس كتير عايز أنصحها بالخطة البديلة عشان لو الحلم مجاش يكون فيه غيره زي ما أنا كان نفسي أبقى لاعب كورة والكورة مش ليا والأندية كلها مشوني رغم تفوقي كنت بسأل نفسي ليه الأبواب كلها بتتقفل في وشي أتاريها بتتقفل عشان توجهني لمسار آخر ولما آمنت بكده فهمت قدام إن ربنا كان شايلي الأحسن ليا بس ساعتها مكنتش فاهم".
"أطلب من ربنا يساعدك" تامر حسني يوجه جمهوره لمعرفة الطريق الصحيح
وأكمل منشوره ليوضح لجمهوره كيف يجدوا الطريق الصحيح حيث قال: "وإللي بيسأل نفسه دلوقتي يعني أنا أكمل في حلمي ولا أشوف حلم تاني هقوله دايمًا أطلب من ربنا يساعدك هتلاقي علامات بتجيلك بس الشاطر إللي يفهمها، علامات هتأكدلك تكمل أو لا بس أجتهد وأتعب عشان المجهود ده ليه كرم متحوشلك في مجالك التاني فأوعى تقول تعبت ع الفاضي".
وأتبع منشوره يتحدث عن المحبطين حيث قال: "وبالنسبة للمحبطين هيفضلوا موجودين أنت إللي بتسمعلهم وأنت إللي بتسمح أنك تتأثر بيهم أمنع ده فورًا متبقاش السبب في أذية نفسك متتشدش غير لكل جميل ولكل إيجابي هتلاقي كل الحلو بيجيلك ومتعملش العكس عشان هيجيلك برضو عشان كده بقولك أنت السبب دايمًا قول يارب وأجتهد وأفهم إن الراحة المطلقة في الجنة بس وأحنا على الأرض وربنا قال إنه خلقنا في كبد يعني شقاء، عشان يكون عندنا تحدي نكسبه ولازم نكسبه عشان كتير قبلينا كانت ظروفهم أصعب ووصلوا يبقى الموضوع فينا".
وأختتم حديثه يحذر جمهوره من أن يكونوا أعداء أنفسهم حيث قال: "متبقاش أكبر عدو لنفسك أنت السبب، خد قرار صارم فورًا في التغيير والنهوض والنجاح والله هتوصل، متسمعش غير لقلبك وسلم قلبك للي خلقه وتوكل على الله".
"لازم ندعمهم".. تامر حسني يدعم الموهوبين
كما قام تامر حسني بنشر خلال خاصية الأستوري على الإنستجرام مجموعة من فيديوهات الجمهور على أغانيه وشجعهم وأبدى إعجابه بالفيديوهات وتفاعل معهم حيث علق على بعض الفيديوهات ومنها فيديو لشاب يغني فأبدى حسني إعجابه بصوته حيث قال: "الله على صوتك وغناك وعلى العزف الجميل، الأصوات دي والمواهب دي لازم ترجع تاني لواجهة الساحة الفنية في مصر، لازم كلنا ندعمهم"، كما علق على فيديو لبنت وهي تبكي على أغنيته قائلًا: "متعيطيش ده أنتي كنتى فرحانه أوي على ليه طله أتحسدتي ولا إيه ولا الأغنية دي على الجرح"، وعلق على فيديو آخر قائلًا: "يمكن بتصوري فيديو بس أنا متأكد إن مشاعرك دي حقيقية ربنا يفرح قلبك وأتفضلي حالًا أسمعي أغنية خدنا مناعة عشان تجمدي شوية لو كان فيه خير ليكي وليه كان هيدوم ليكي وكنتي هتدومي ليه ربنا يفرح قلبك"
