بعد تصدرها للتريند.. سر رشاقة سماح أنور
حلت الفنانة سماح أنور أمس ضيفة على برنامج "كلام الناس" مع الإعلامية ياسمين عز، وكشفت خلال اللقاء عن بعض الكواليس المتعلقة بحياتها الشخصية، كما تحدثت عن أعمالها الفنية، ولا سيما مسلسل “الليلة واللي فيها”، الذي يعرض حاليًا على منصة “شاهد” مما جعلها تتصدر مؤشرات البحث "جوجل".
سماح أنور تكشف سر حفاظها على وزنها
كشفت الفنانة سماح أنور خلال حلقتها فى برنامج" كلام الناس" أمس، عن سر حفاظها على وزنها، حيث أكدت أنها تتناول وجبة واحدة خلال اليوم فقط، كما تقوم بشرب كوب نسكافيه فقط عند الاستيقاظ من النوم، مُضيفة: "باكل كل حاجة بيتزا ومكرونة، أنا باكل مرة واحدة في اليوم طول حياتي، ما وقت ما خلصت المدرسة وابتديت أمثل، إحنا بيجيلنا البريك مرة واحدة في الأوردر وإحنا بنشتغل من 12 لـ 18 ساعة، فبناخد وجبة واحدة، وخلاص وبنشتغل، فأنا بشتغل من وأنا عندي 16 سنة فعلا، ودي كانت الفترة اللي كان شغلي فيها كتير أوي فيها فقعدت نحو 15 سنة بشتغل كتير أوي، وده كان نظام حياتي".
سماح أنور: باكل قبل ما أنام بخمس ساعات
وتابعت الفنانة سماح أنور حديثها عن سر رشاقتها قائلة: "بفتكر إن إحنا هناكل علشان فيه بريك بس، زائد إن أنا بحب الرياضة جدًا، طول عمري رياضية، فالحكاية مخليا جسمي على طول بيحرق طول الوقت، وسواء عندي شغل ومعنيدش شغل، أنا مبجوعش غير بالليل، أنا باكل بالليل، المهم في الموضوع ما أكلش قبل ما أنام على طول، لازم آكل قبل ما أنام بـ 5 أو 6 ساعات، وأنا نفسي مش بنام بدري، أنا مش من الناس اللي بتنام بدري، بصحى بدري لكن معرفش أنام بدري، عشان كده باكل الساعة 8 أو 9 أو 10 وبنام 3 أو 4 أصلي الفجر وأنام كده يعني".
سماح أنور تكشف عن نصيحة والدتها لها
كما كشفت الفنانة سماح أنور عن نصيحة من والدتها لها ساعدتها فى الحفاظ على وزنها حتى الآن رغم تناولها العديد من الأشياء التى تسبب وزن زائد، فقالت:" باكل اللي يعجبني، آيس كريم فاملي، رغيف ونص باجيت، مانجه فص كيلو أكله ورا بعض مانجايه ورا مانجايه، لحد الساعة 12 بكون شبعت خلاص، هموت من الشبع، وبصحى أشرب نسكافيه، وبقعد اشتغل، إحنا عندنا مشكلة، الناس اللي عايزه تعرف إحنا ليه بنتخن، الموضوع مش ريجيم، أمي زمان قالتلي جملة حكيمة جدا جدا، حافظتلي على وزني لحد انهارده، عايزة تخسي، اقفلي الخرم اللي في وشك، لإن هو ده اللي بيتخن، وإحنا مبفكرش، بنحس بنعمل وبعدين نندم، مفيش حاجة بتعدي على المخ، كل حاجة عندنا لازم يبقى فيها أكل، خروجة أو زيارة وشهر رمضان، السيستم عايز يهضم ويرتاح".
