عايزين منه إيه.. عمرو أديب يهاجم مروجي شائعة إصابة الزعيم بمرض الزهايمر

هاجم الإعلامي عمرو أديب مروجي شائعة إصابة الزعيم عادل إمام بالزهايمر، التي انتشرت في الأيام الماضية، وقال أديب خلال لقائه مع et بالعربي على هامش حضوره احتفالية افتتاح المقر الرئيسي لمجموعة MBC في الرياض: "أحنا ليه مش عاوزين الناس تبقى في سلام، دا عادل إمام دا الزعيم عايزين منه إيه، دي مش محبه واطمئنان دا فضول قاتل وأغلب الهاشتاجات تشفي، التيارات الدينية اللي بتكره عادل إمام تشفت فيه وما صدقوا على الخبر ده والناس اللي قالت عليه الكلام دا رجعت قالت لا إحنا بنحبه ومنقصدش".

وإضاف عمرو أديب: أنتوا عايزين منه إيه الراجل اللي أسعدكم مستكترين عليه أنه يبقى سعيد وهادي في حياته توحش الناس بقت متوحشة سيبوا الناس في سلام"، استكمل: "خليه في حاله سعيد ومبسوط في الصورة دي، لما جت ليلى مراد قررت مش هتغني تاني قالت مش عايزة اتصور مش عاوزة حد يشوفني عايزة الصورة دي تفضل، دا بني آدم ليه عيله وأخوات وحياة دا ميستحقش منكم هذا التكريم والاحترام لحياته ارحموا الناس بلاش جنان". 

المنتج عصام إمام عن صحة شقيقه

عبر المنتج عصام إمام عن غضبه وحزنه من كثرة الشائعات التي تنتشر كل فترة على شقيقه الفنان عادل إمام وقال في مداخلة هاتفية مع الإعلامي عمرو أديب في برنامجه "الحكاية": أنا مش عارف الناس دي مستعجلة على إيه، إيه سبب أن يتقال كده، دا عادل إمام لو فيه حاجة ولو في مستشفى العالم كله هيعرف".

وتابع عصام إمام: "ليه أستاذ محمد الباز ودا راجل إعلامي كبير ممكن يتحرى من الخبر، لو في حاجة الكل هيعرف، أنا جالي مكالمات من أمريكا وأستراليا من ناس أنا معرفهمش بيسألوا، أنا برد على حاجة تخص الأسرة ولما يقولوا أن عادل إمام تعبان وفي مستشفى لازم أرد لكن أنا زهقت".

وكان المنتج عصام إمام سبق وتحدث عن عودة الفنان عادل إمام في فيلم "الواد وأبوه" الذي سيجمعه بابنه محمد وسيكون من إخراج ابنه رامي.

محمد الباز عن الحالة الصحية للزعيم

قال الإعلامي محمد الباز في برنامجه آخر النهار: " الأستاذ عادل إمام في مرحلة سنية وصحية لن يقدم أي عمل فني قادم على الإطلاق، وعيلته لا بد أن تحترم هذا، وعندما يقال أنه اعتزل العمل الفني، هذا أمر لن ينقص منه شيء، ومن حق جمهور عادل إمام أن هيعرف حالته الصحية، ومن مقربين راحوا لعادل إمام وبحكم السن هو يعاني من بعض أعراض الزهايمر وهذا طبيعي".

آخر أعمال الزعيم عادل إمام

غاب الزعيم عادل إمام عن رمضان 2022، وكان آخر أعماله في رمضان 2020 ومسلسل "فلانتينو" وشاركه بطولته داليا البحيرى ودلال عبد العزيز وحمدى الميرغنى وطارق الإبيارى وهدى المفتى، وهو من تأليف أيمن بهجت قمر وإخراج رامى إمام.