خاص.. الملحن إسلام زكي: "حياتنا" كانت هتنزل في ألبوم "عشأنجي".. وهذه كواليس العمل مع تامر حسني

كشف الملحن إسلام زكي، عن كواليس تعاونه مع النجم تامر حسني في أغنيته الجديدة "حياتنا"، التي تم طرحها أمس، عبر قناته الرسمية بموقع الفيديوهات الشهير "يوتيوب".

وفي تصريح خاص لـ "الفجر الفني " قال إسلام زكي: "بعد نجاح أغنية (قد الفراق) الذي طرحت في عام 2020 ودي كانت أغنية دراما وكانت أغنية ناجحة جدًا كنت حابب أقدم حاجة مع تامر حسني وتكون مختلفة أكتر، عن الأغاني اللي بتتكلم عن الحبيب والفراق  والاشتياق.

وأضاف: "لما أحمد حسن راؤول بعتلي كلمات الأغنية، الكلام لمسني ولمسنا كلنا لأن كلنا يعتبر مرينا بالتجربة دي وتجربة الحب عمومًا، مش شرط يكون حب الحبيب إطلاقًا، وكمان أن الأغنية بتتكلم إزاي الحب بياثر علينا زي جملة "حب يعجزك بدري وحب يموتك جواك"، وكمان ان في ناس تساعدك ووقت الشدة متلقيهاش.

كواليس أغنية “حياتنا”

وقال إحنا كصناع الأغنية لقينا أن الموضوع إجتماعي أكتر وبتناقش قضية وحالة عامة عند الناس كلها.

وأضاف: "اشتغلنا على الاغنية فترة طويلة مع الموزعين إلهامي دهيمة وأحمد حسام وحقيقي هما من الناس العباقرة ودول من الموزعين اللي تقريبًا بشتغل معاهم 5 أو 6 مرة وبنفهم بعض جدًا وهما كمان في بينهم وبين تامر حسني كيميا بشكل كبير فبنقدر نوصل ونقرب الأفكار لبعض ونعمل كذا شكل وخيال لحد ما نوصل لأقرب وجهه نظر من اللي عايزه الفنان تامر حسني.

وتابع: "إحنا أساسي بنكون حاطين وجهه نظر اللي بتكون عجباه  فبنكمل عليها وهو بيضيف حاجات ونزود حاجات لحد ما نوصل للصورة أو الشكل اللي الناس بيسمعوه في الاخر.

 كواليس العمل مع تامر حسني 

قال إسلام زكي: “طبعًا الشغل مع تامر حسني مختلف لإنه كل فنان له طابع خاص في طريقة التعامل وطريقة التفكير وفي الطريقة اللي بيخاطب بيها جمهوره”.

وكمان الشغل مع تامر مختلف بشكل كبير لإنه نشيط جدًا جدًا زياده عن اللزوم يعني ممكن في اليوم الواحد نعمل مثلًا أكثر من تعديل يوميًا عشان نوصل لأحسن صورة.

إسلام زكي: أغنية حياتنا هي من أحلي الأغاني اللي اتغنتلي من تامر حسني

وأكد: “وهو فاجئني بالغنا الصراحة يعني أنا أول مرة سمعت الغنا كأنه هو اللي ملحن الاغنية لأنه عنده إحساس غير طبيعي أنا نفسي دي يعتبر من أحلي الأغاني اللي متغنيالي من لحني من الفنان تامر حسني”.

نجاح أغنية "حياتنا"

و قال إسلام زكي عن نجاح أغنية حياتنا: “الحمد لله ربنا كتبلها النجاح ونزلت في وقت كويس جدًا، وهي ف الأول كانت المفروض هتنزل ف الألبوم بس بعد كدة تامر حس أنها هتكون مناسبة أكثر للفيلم ف شلها للفيلم ونزلت في الفيلم وكان اختيار موفق ومكانها ف الفيلم حلو جدًا وأعتقد كمان أن الناس شافت لما نزلت كان سبب تاخيرها ايه”.