صابرين لـ "الفجر الفني": مكنتش متوقعة نجاح "أعمل إيه!؟".. كواليس المسلسل الأمتع في حياتي.. وهذه أعمالي القادمة (حوار)
بعد النجاح الكبير الذي حققه مسلسل "أعمل إيه!؟" حاور "الفجر الفني" النجمة صابرين، حيث كشفت كواليس مسلسل "أعمل إيه!؟" وتفاصيل العمل مع الفنان خالد الصاوي، كما أوضحت أيضًا رأيها في بعض الأمور وأعلنت عن أعمالها المرتقبة.
حدثينا عن كواليس مسلسل "أعمل إيه!؟" ؟
"كواليس المسلسل ده من أحلى الكواليس اللي عشتها في حياتي، لأن المخرج أحمد عبد الحميد من اكتر الناس الذي بحس معهم في البلاتوه أنه أخ، المؤلف محمد الحناوي مش بيسيب اللوكيشن قاعد معانا طول الوقت".
وتابعت: "الحمد لله أيضًا كل علاقاتنا ببعض علاقات جميلة جميعنا أصدقاء والصغير يحترم الكبير، ويوجد آداب مهنة راقية جدًا والإنتاج سينرجي لما بشتغل معاه دائمًا بحس أني في بيتي حقيقي بتكون حاجة محترمة جدًا جدًا".
ما رأيك في المواهب الشابة الموجود في المسلسل؟
"المواهب الشابة التي تعاونت معنا جميلة جدًا مجتهدين أوي، وخصوصًا بناتي كمان عاملين شغل لذيذ أوي وصاحبتهم أيضًا عاملين شغل لذيذ أوي".
وأكدت: "مصر دائمًا ولاده ومصر بخير، حقيقي الواحد بيكون فرحان أوي بشباب زي كدة عندهم إبداع وعندهم كاريزما لذيذة وهو ده القوي الناعمة الذي دائمًا بنكون فرحانين بوجودها دائمًا وأبدًا في مصر".
ما انطباعك عم العمل مع الفنان الكبير خالد الصاوي ؟
"خالد الصاوي من عشرة العمر الجميلة، كمان إحنا اتقابلنا من أيام مسلسل "أم كلثوم" وقبل هذا المسلسل تعاونا سويًا في افلام سينما في ذلك الوقت كان خالد الصاوي مساعد مخرج"
وأضافت: "أنا وخالد عملنا مع بعض أعمال كثيرة جدًا وعلي مراحل عمرية مختلفة، حقيقي في بينا كيميا بينا يعني انا بشتغل مع أخ.. وحقيقي أنا بحس أن فعلًا خالد الصاوي أخ جميل وسند كدة في الأستوديو سانده عليه زي ما بيقولوا.. وهو حد محترم جدًا بيحب المهنة ومتفاني فيها جدًا”.
هل توقعتي نجاح المسلسل؟
"مكنتش متوقعة خالص بصراحة نجاح المسلسل.. تقريبًا من الحلقة 6 ابتدأ رد الفعل يبقي قوي جدًا جدًا، والحمد لله نجاح المسلسل ده حاجة مشرفة جدًا وفرحانين كلنا بيها، وكانت ظروف التصوير صعبة جدًا بسبب الجو” مضيفة: "بدأنا تصوير في عز الحر والحمد لله إحنا فرحانين كلنا بنجاح العمل".
ما تقييمك للدورة للأولى من مهرجان القاهرة للدراما ؟
"شايفة تجربة مهرجان الدراما أن ناس كتيرة زعلت أنها محضرتش ومتكرمتش.. وزعلت إنها مكانتش موجودة ف ده أكبر دليل علي نجاح المهرجان الحمد لله، كان في حب قوي جدًا وبانت طاقة الحب دي للمشاهدين واللي كانوا موجدين والضيوف".
ما رسالتك لـ منتقدي تصرفك العفوي مع الفنان الكبير يحيى الفخراني ؟
"دكتور يحيي الفخراني، صديقي من أيام الفوازير يعني من زمان جدًا، إحنا اصدقاء وبنحب نهزر مع بعض حتي الكيميا دي كانت باينة أوي في مسلسل "شيخ العرب همام".
وأضافت: "أنا اشتغلت صغيرة أوي أوي ف ممكن يكونوا ناس أكبر مني في السن لكن إحنا صحاب جدًا فلغة الهزار اللي بينا علطول موجودة".
وتابعت: "يحيي الفخراني ولميس يمكن أكثر ناس دخلت بيتي وأنا كنت قبل المهرجان باسبوعين عندهم وقاعدة معاهم في بيتهم يعني إحنا اصدقاء مهنة وبره المهنة كمان في دكتور يحيى من اكثر الناس اللي بحبهم في حياتي واكثر الناس اللي بحترمهم في المهنة أنا حقيقي بعزه جدًا وبينا احترام متبادل وصداقة عمر من وقت الفوازير".
مارأيك في المسلسلات القصيرة وهل تحبين تكرار هذه التجربة ؟
طبعًا.. أحب أن أكرر التجربة لو الموضوع والنص كويسين، وفكرة جديدة بره الصندوق طبعًا بعملها فورًا.
وأضافت: "أنا معنديش مشكلة في كم عدد الحلقات المهم يكون في رسالة، وأن أنا اعمله بحب ومصداقية توصل للناس ده اهم حاجة".
حدثينا عن دورك فى فيلمي “إصابة عمل” و“الملحد” ؟
"فيلم إصابة عمل، مبقاش اسمه إصابة عمل بقى اسمه "هاشتاج جوزني"، ده فيلم بره الصندوق خالص هيعجبكم أوي أنا عاملة فيه دور لذيذ وطعم وكوميدي يارب ان شاء الله يعجبكم".
و عن فيلم الملحد قالت: " العمل عليه جدل كبير أوي أتمني ينزل ويتعرض، لأني عاملة فيه دور جديد خالص يارب إن شاء الله يبقي فيه نجاح، وكل طاقم العمل عمل فيه مجهود كبير من أول ماندو العدل ؤ محمود حميدة، حسين فهمي، أحمد حاتم، شيرين رضا تارا عماد، ومجموعة كبيرة جدًا عاملين حاجة كويسة يارب ان شاء الله تعجبكم".
ما هي أعمالك القادمة ؟
"في عمل إن شاء الله 15 حلقة لمنصة في رمضان بشوفه وبقرأه وبيتكتب ف يارب بإذن الله يتعمل ويبقي حاجة كويسة والناس تحبها ده الجديد بالنسبالي، و في فيلم كدة إن شاء الله بردو يعني اتكلمنا فيه بس لسه ممضتش وإن شاء الله يكون مفاجئة كبيرة".
