بيحاولوا يموتوك بالحيا.. راندا البحيري تعبر عن استيائها من عدم دعوتها لحضور المهرجانات الفنية

'شايفين أنك مبقتش موجود'.. راندا البحيري تعلق على عدم دعوتها لحضور المهرجانات الفنية

الفجر الفني

راندا البحيري
راندا البحيري

عبرت الفنانة راندا البحيري عن استيائها من عدم دعوتها لحضور المهرجانات الفنية، مؤكده أنها في بدايتها كانت من أوائل الفنانات اللاتي تحضرن المهرجانات الفنية التي تمثل مصر، ولكنها فوجئت بعد سنوات من عدم دعوتها لحضور أي مهرجان.

 

راندا البحيري 

 

وعلقت رندا البحيري عبر حسابها بموقع فيس بوك: بحب بلدي وهفضل أحبها.. بلدي ماشية في دمي وجوا قلبي، من سنوات وإلى الآن مثلت بطولات وأفلام كتير جدًا، زمان بقى كنت اقرأ دايمًا مانشيت في مُعظم الجرايد والمجلات مكتوب "غياب نجوم السينما عن مهرجان السينما"، وكنت بسمع بوداني إشادة بيا وبكام زميل يتعدوا على صوابع الإيد الواحدة.

واستكملت رندا: كنا بنروح سنويًا ندعم مهرجان بلدنا من قلبنا، والدليل أنه من قلبنا أن مكانش فيه سوشيال ولا ترند ولا حاجة بتحصل ولا بناخد فلوس ولا بناخد شهرة إحنا بس بنروح علشان نقف جنب مهرجان بلدنا اللي كان دايمًا بيتعمل في الأوبرا المصرية.

 

راندا البحيري 

 

راند البحيري: زي ما يكون حد مسح اسمي من المدعويين

 

وأضافت راندا: وعلى الناحية التانية كان فيه ممثلين مبيروحوش مهرجان بلدهم ده وبيهتموا جدًا بمهرجانات منافسة في بلاد معندهاش سينما بس علشان هياخدوا فلوس كتير لما يروحوا وكانوا بيروحوا جري وكنت برفض علشان بلدي، وكتير أوي من السنين كنت منتظمة في الحضور والندوات وغيره، لحد ما القائمين على المهرجان اتغيروا وهوب من ساعتها اتقطعت الأخبار.

واتبعت راندا: العنوان الحالي اللي هو نفسه العنوان القديم اللي كان بييجي عليه الدعوات لسه موجود ومبيجيبش عليه أي دعوات.. زي ما يكون حد جه تدخل ومسح اسمي من المدعويين.. عمومًا هو ريحني من وجع قلب الماكياج والشعر واختيار فستان مناسب ولائق للحدث.. وبجد بجد أنا عند نفسي كبيرة أوي أوي أوي مكان مش عايزني هو اللي خسران والله هو اللي خسران مش أنا.

 

راندا البحيري 

 

راندا البحيري: لو مصاحب الكل هتبقى موجود ولو مش مصاحب الكل حقك هيتاخد

 

واوضحت: ده حصل من سنين كتير أوي وأنا عمري ما بروح مكان مش معزومة عليه ولا بروح مكان من غير دعوة علشان كده عمري ما هروح، والبوست ده مش علشان هم يعرفوا أن مبيجيليش دعوة لا البوست ده ردا على كل الناس اللي بتقول أنت ليه مبتشتغليش أو ليه مش موجود، علشان الدنيا كده.. أنت لو مصاحب الكل ولذيذ وعسل هتبقى موجود ولو مش مصاحب الكل حقك هيتاخد.

 

راندا البحيري: عاملة أكتر من 500 عمل فني

 

وكشفت راندا البحيري عن عدد أعمالها، قائلة: أنا كفاية عليّ أني عاملة أكتر من 500 عمل فني وممكن أكتر  بين أقل من 100 فيلم سينمائي وأكتر منهم مسلسلات إذاعية وتليفزيونية ومسرح ومشاريع تخرج ودوبلاچ، مثلت كتير جدا، ومثلت أدوار كتير بجد التاريخ هيفتكرها، ومثلت مصر وجبت لـ بلدي جوايز، وخدت دبلومة شرفية في التمثيل وخدت ألقاب برا البلد كتير جدا لكوني ممثله مصريه متميزة.

 

راندا البحيري 

 

راندا البحيري: يحاولوا يموتوك بالحيا وشايفين أنك خلاص مبقتش موجود

 

وأردفت: المهرجان ده اللي مبيبعتليش "هو نفسه" كان مدخل أفلامي على هامش المهرجان بتتعرض فيه وكنت مرشحة لأكثر من جائزة.. ومهرجان الإسكندرية اللي بيتعمل كل سنة من غيري برضه، واخدة منهم جائزة أحسن ممثلة مرتين ومرة من جمعية نقاد الفيلم.

واختتمت: يعني مهرجانات شايفاك أحسن ممثل باعترافهم وجائزتهم بيحاولوا يموتوك بالحيا وشايفين أنك خلاص مبقتش موجود أو مش متعرفين بوجودك، أنا كمان مش معترفة بوجودكم، وبجد والله من غير ذكر أسماء كان فيه مهرجانات برا بلدي بتتعمل وكنت بغير على مهرجان بلدي وكنت بستني من السنة السنة علشان نحتفل بالسينما وبالشغل، حسبي الله ونعم الوكيل.

 

راندا البحيري 

 

آخر أعمال راندا البحيرى

 

والجدير بالذكر ان آخر أعمال راندا البحيرى هو مسلسل "الأخ الكبير"، وهو مسلسل ينتمي لنوعية أعمال الـ 45 حلقة وتدور احداثه في حي بولاق الشعبي، حيث يحاول الشاب الفقير حربي محمد رجب مواجهة العديد من التحديات في حياته والتغلب عليها، سواء على الصعيد الأسري أو العملي، وهو من تأليف أحمد عبد الفتاح وإخراج إسماعيل فاروق.

كما شاركت في فيلم "الحوت الأزرق" الذي تدور أحداثه حول (لعبة الحوت الأزرق) بعد انتشار التكنولوجيا وانشغال الأب والأم عن أبنائهم وما قد يؤدي لتعرضهم للموت، شارك في العمل كلا من أحمد سلامة وعماد رشاد وأحمد صيام وعبد الله مشرف وراندا البحيري، وهو من تأليف أسامة حسام الدين ومن إخراج الفنان علاء مرسي.