كل الناس حبته لأنه يخش القلب.. آسر ياسين يودع مساعده بكلمات مؤثرة

ودع الفنان آسر ياسين مساعده مجدي الذي رحل عن عالمنا منذ 3 اسابيع، وقام بنشر صورة تجمعه به عبر صفحته الرسمية بموقع التواصل الإجتماعي "فيسبوك".

وعلق آسر ياسين عالصورة قائلًا: 
اهداء لمجدي! 
‎كان المساعد بتاعي لأكتر من ١٤ سنة، قصته فيها كمية عِبر حياتية غير طبيعية.. اشتغل كهربائي لمدة تلاتين سنة وبعد كده حصلتله حادثة موت اتكتبله فيها عمر جديد..ومن هنا ابتدا يشتغل مساعد ليا بناءًا علي نصيحة أبويا اللي رشحهولي عشان اخلاصه وأمانته.. عمره ما كان يتخيل إنه يشتغل في السيما ويقابل روبي ومني زكي ومحمود حميدة!! ومش بس كده، ده كمان وقف قدام الكاميرا كذا مرة في أدوار شرفية..

وتابع: كل الناس حبته لأنه يخش القلب علي طول لطيبته وبساطته.
‎كان يخاف عليا جدًا بالذات في مشاهد الاكشن..وكنا ساعات بنتقمص من بعض لما نخش في حوارات عبثية عن الحياة وبعدها نقوم مهيفيين بأي كلام زي الصورة اللي في البوست.
اللذيذ في الموضوع إنه كان ييجي يسألني عن نصيحتي في حاجات شخصية علي رغم فرق السن..مفيش طفل يشوفه غير ولازم يبتسم لا إراديًا بسبب وشه البشوش والطفولي.

واختتم: مجدي رحل عن عالمنا من ٣ أسابيع، ولحد النهاردة أنا ما اتكلمتش عنه. يمكن لأني بتجنب ده أو أني معتبره ماحصلش، مش عارف.. بس اللي عارفه كويس أوي أنه حقيقي واحشني. 
سلام يا ميجو 
الفاتحة

آخر أعمال آسر ياسين

يذكر أن آخر أعمال آسر ياسين كان مشاركته بمسلسل سوتس بالعربي الذي تم عرضه في الموسم الرمضاني لعام ٢٠٢٢، سوتس بالعربي ‏ أو قضايا اختصارا، هو مسلسل مصري عُرض في شهر رمضان عام 1443 هـ، وهو النسخة العربية من المسلسل الأمريكي سوتس.

قصة مسلسل سوتس وأبطاله

تدور الأحداث في كواليس عالم المحاماة والقضايا، حيث يتناول العمل قصة آدم والذي يتحول عن طريق الصدفة إلى محامي في شركة محاماة كبيرة حينما يكشف سره للمحامي زين، ومعا يتولى الثنائي العديد من القضايا الشائكة، والعمل من تأليف، آرون كورش
إخراج عصام عبد الحميد
سيناريو محمد حفظي، ياسر عبد المجيد، محمد جلال، محمود نصار، سارة الطوبجي، نادين بدراوي
بطولة آسر ياسين، أحمد داود، صبا مبارك، ريم مصطفى، محمد شاهين، تارا عماد.