بعد تصدرها التريند.. أبرز تصريحات هند عاكف في برنامج " نص الكلام "

الفجر الفني

هند عاكف
هند عاكف

تصدرت الفنانة هند عاكف،  محركات بحث جوجل في الساعات الماضية بعد استضافتها في برنامج " نص الكلام " مع الإعلامية رغدة شلهوب على شاشة النهار الفضائية، وتحدثت عن تفاصيل أزمتها في مهرجان القاهرة السينمائي في دورته الأخيرة ال 44، وعن فساتينها المختلفة في المهرجانات الفنية، ووجهت رسالة للفنان حسين فهمي، لذلك نستعرض أبرز تصريحاتها في السطور التالية.

تفاصيل أزمة هند عاكف في الدورة الـ 44 بمهرجان القاهرة السينمائي 

 

وقالت هند عاكف، إن أزمة عدم حصولها على دعوة بسبب رد مكتب الفنان حسين فهمي، عليها بأن دعوات الممثلين مع نقابة المهن التمثيلية، ما جعلها تعود للنقيب الفنان أشرف زكي. 

 

وأضافت هند عاكف، أن أشرف زكي رد عليها بـ رسالة صوتية، وقال نصًا: "مفيش الكلام ده". 

 

وقالت الفنانة هند عاكف خلال برنامج " نص الكلام ": "أنا بلبس حاجات غريبة بس مبأذيش حد علشان أبقى بخالف الدريس كود والدريس كود على عيني وعلى راسي بس لو اتبعتلي دعوة واتطلب مني عدم مخالفته، لكن أناجيت ليه تحرجوني! والمهرجان ده لو مهرجان خاص لو قطعتي رقبتي ما كنتش روحت من غير دعوة لكن ده مهرجان بلدي دي مش حفلة واللي حصل معايا ده إساءة وماكنش يجب إنه يحدث أبدا، وبطالب أستاذ حسين فهمي لازم ينتقى الكشف بتاع المدعوين ومين الناس اللي تستحق وعلى رأسهم الفنانين وبعد كده أي حد تاني". 

هند عاكف 

وأضافت الفنانة هند عاكف:" ولو هما مرضيوش يبعتولي دعوة علشان لبسي ففي ناس كتير كانت لابسة فساتين كتير مستفزة وفيها إثارة والشارع مش بيحبها منهم الفنانة سلمى أبو ضيف وهبة السيسي وأكتر من حد تاني والبلوجر بيروحوا علشان يتصوروا على الريد كاربت مش علشان شغل لكن أنا بحضر الأفلام علشان أتعلم لغاية النهاردة".

سبب بكاء هند عاكف في برنامج “ نص الكلام ”

 

وتابعت باكية: "ينفع الكلام ده مع فنانة بتشتغل وهي عندها 4 سنين، أنا كنت بدخل المهرجان ده والدعوة بتبقى في العربية، الدعوة كانت من زميل مش هذكر اسمه، قالي يا هند أنا شفت الفيديو بتاعك وانتي عايزة تروحي المهرجان، قولتله أيوه أنا عايزة أروح، قالي أنا مش هروح عندي ظروف ومسافر، أنا هبعتلك دعوتي، معرفش بقى فيه أسامي أو مفيش أسامي، قولتله أوكيه، قالي بس متبلغيش حد إني اديتك دعوة عشان هم ممكن يبعتولك دعوة، لو بعتولك دعوة هاتيلي الدعوة، عشان ممكن أديها لحد تاني "

 

وواصلت: "يومها أنا نزلت كنت ماسكة الفستان، وكنت نازلة بالدعوة من البيت، أنا دمعتي نزلت دلوقتي عشان صعبان عليا تاريخي وتاريخ عيلة عاكف، اللي أنا شايلاه طول عمري ومحافظة عليه، يقوم المنظمين يعملوا كده، وكان فيه لازم أورود يتاخد، أنا معرفش راحت فين الدعوة، ولقيت نفسي وصلت، قولت استحالة يعملوا معايا موقف زي ده، لازم يدخلوني، أو يتصلوا بالإدارة جوه وهيدخلوني من غير مشاكل، أنا ليا تاريخ بجد أنا مش بهزر، أيا كان كبير أو صغير، أنا ليا تاريخ وليا وضعي وأعمالي الفنية المحترمة، بغض النظر إني بعدت شوية وليا تاريخ أيضا في الفترة اللي بعدها، أنا مبعدتش عشان اتفسح أنا كنت بعمل حاجة لصالح بلدي وللمواطن المصري".
 

رسالة هند عاكف للفنان حسين فهمي 

 

واستكملت: "أنا هعتب على الأستاذ حسين فهمي، كرئيس مهرجان مش كفنان، المفروض يا أستاذ حسين كنت بلغت إدارة التنظيم إن لو حصل مشكلة نحلها إزاي؟ لو حصل مشكلة على الريد كاربت، وفيه فنان أو فنان جاي هيدخل بيته أو بيتها، ده بيتي المفروض، يقولولها اتفضلي، محدش يمنعها، أولا لتجنب المشاكل، ثانيا، لإن إحنا فنانين، والمهرجان ده مهرجان بلدنا ومهرجانا إحنا" 

حسين فهمي 

وأضافت: “بيقولوا القاعة بتتسع لـ 1050 كرسي فقط، ومش هنقدر نستوعب كل الفنانين أو مش هنقدر ندعي كل الفنانين، لو الدعوات راحت للفنانين بس، الناس كانت هتدخل وترتاح، البلوجر مع احترامي ليهم، الفنان الأول وبعدين البلوجر، السنة اللي فاتت كان قاعد جنبي 3 فيهم 2 دكاترة، وميطلعش البلوجر على الريد كاربت وهند عاكف ميتبعتلهاش دعوة، وعادي آخد دعوة من زميل، وأنا جهزت نفسي وعايزة أروح مهرجاني، وعايز أتابع المهرجان، والناس تعرف إني رجعت، وكانوا بيمنعوني، قولتلهم استحالة الدعوة نسيتها فعلا، وأنا أول مرة أقول كده، وده عادي ممكن زميل يقولي معاكي دعوة زيادة”.

 

وواصلت: " ساعات في المهرجانات اللي فاتت كانت الدعوة بتكون في العربية وأدخل عادي، وحسين فهمي عمل تقريبا مداخلة، قال هند تقريبا جات المقر، وأنا طبعا مقولتش إني عاملة فستان ودريس، أنا طبعا مقولتش الكلام ده، يمكن هم بلغوا رسالة غلط، مرحتش أوريهم الفستان هدخل بيه أو مش هدخل بيه؟، لكن هو ما دام عرف إني جيت المقر، يعني أنا عايزة أحضر المهرجان، وكلمتك يا أستاذ، كان ممكن يقول هاتي دريس يصلح للمهرجان، والمفروض كان يكون في تعليمات، والمشكلة اتحلت في ثواني على فكرة، وفي أكتر من شخص تدخل بصراحة".

أفضل المخرجين والنجوم في عيون هند عاكف

 

على جانب آخر، تحدثت هند عاكف عن الرؤية الإخراجية للمخرج خالد يوسف مقارنة برؤية المخرجة إيناس الدغيدي.

 

وأوضحت أنها تفضل العمل مع محمد هنيدي عن العمل مع محمد رمضان، وأشارت إلى أن ريهام حجاج تتفوق على مي عمر، ولكنها تحتاج إلى التخلي قليلًا عن انفعالاتها المبالغ فيها.

 

وكشفت هند عاكف أنها ترى أن منى زكي أفضل من هند صبري، رغم حبها للفنانتين،و ترى رانيا يوسف تصلح لتقديم أدوار الإغراء أكثر من روبي، مشيرة إلى أنهما قدمتا العديد من الأدوار الجيدة.
 

هند عاكف تثير الجدل بمهرجان القاهرة السينمائي الدولي 

 

يشار إلى أن الفنانة هند عاكف مرت بأزمة خلال فعاليات مهرجان القاهرة السينمائي وهي منعها من دخول المهرجان وعدم إرسال دعوة لها وحدثت مشاجرة وقتها بينها وبين المنظمين على البوابة حتى تدخل العديد من الفنانين لإنهاء الموقف ودخلت بعدها هند عاكف المهرجان.

كما أثارت الفنانة هند عاكف الجدل على السجادة الحمراء بمهرجان القاهرة السينمائي الدولي بعدما حاول المنظمون منعها من الدخول بسبب ارتدائها فستان مخالف للتعليمات. 

 

ارتدت هند عاكف فستان طبع عليه صور عدد من النجوم الراحلين، ولم تلتزم بالدريس كود المخصص الذي حدده الفنان حسين فهمي وحينما حاولوا منعها أثارت خلافا قائلة:" مينفعش حد يمنعني أدخل مهرجان بلدي".

جدير بالذكر، ظهرت عدد من النجمات بإطلالات غريبة على الريد كاربت في مهرجان القاهرة السينمائي الدولي في دورته الـ 44 رغم تحذيرات رئيس المهرجان الفنان حسين فهمي، وعلى رأسهم دومينيك حوراني وسلمى أبو ضيف وللا فضة وغيرهن. ارتدت سلمى أبو ضيف فستانا على الطريقة الصينية مكشوف وغريب الشكل، وظهرت دومينيك حوراني بفستان أحمر اللون جريء، فيما حضرت على السجادة الحمراء عدد من الشخصيات المجهولة.