سلوى عثمان تكشف لـ "الفجر الفني" كواليس "العيلة دي" وتوضح رأيها في المواهب الشابة المشاركة في المسلسل (خاص)
كشفت الفنانة "سلوي عثمان" كواليس مسلسل "العيلة دي" كما أوضحت فكرة المسلسل وكشفت كذلك عن رأيها في المواهب الشابة المشاركة في المسلسل.
كشفت سلوي عثمان لـ "الفجر الفني" مالذي تدور حوله شخصيتها في مسلسل "العيلة دي" حيث أوضحت قائلة: "مسلسل العيلة دي بيتكلم عن عائلات مصرية.. كل عيلة لها حكاياتها الخاصة وتوجد نوعيات مختلفة من العائلة المصرية بس في النهاية هما عائلات مصرية بيتكلموا عن ترابط العائلة من عدم الترابط".
.و أضافت: "المسلسل بيوضح فكرة الراجل اللي بيسافر وبيسيب أهل بيته وبيتغرب عشان الفلوس وأيضًا يوضح الشباب وطريقة تفكيرهم وبيتصرفوا ازاي".
وتابعت: "أما العيلة بتاعتي أنا وضياء الميرغني بتتكلم عن أنهم كانوا في مستوي مش عالي جدًا.. بس ربنا كرمهم وبقوا في مستوي أعلي من أختها دلال التي هي الشخصية الرئيسية في المسلسل التي تقدمها (وفاء عامر)، وبيكون في مفارقات بينهم".
و أضافت: "عيلتنا سلامة زوجي في المسلسل الشخصية التي يقدمها "ضياء الميرغني" بيكون عايز تنويع وأن زوجته أنا تكون دائمًا معاه وبتعمل اللي عايزه وأنه بيطلب يلعب بالألعاب الصغيرة، لأن وهو صغير كان محروم من الألعاب وعمل مصنع ألعاب، وأيضًا هو بيطلب مثلًا أننا نمثل جزء من مشهد في فيلم، والشخصية بتعمل كل ده عشان خاطر زوجها ميضيعيش منها، بس في نفس الوقت في الآخر هيكون في مفاجأة كبيرة بالنسبالها".
وكشفت عن ردود الأفعال التي تراها عبر مواقع التواصل الإجتماعي قائلة: "والله أنا مش بشوف سوشيال ميديا كتير بس شوفت، تعليق مكتوب عن المشهد بتاع الفيل الأزرق اللي كنت بعمله أنا وضياء في المسلسل شوفت تعليق ظريف أوي، بس أنا بشكل عام الفترة دي مش فاضية أشوف كل التعليقات".
وتحدثت "سلوي عثمان" عن كواليس مسلسل "العيلة دي": "كواليس المسلسل جميلة جدًا، والناس والزملاء كلهم القدام والجداد كله زمايل وكل شخص في المسلسل حاسس أنه بينتمي للعائلة اللي فيها، يعني في الآخر كلنا عائلات مختلفة بردو بتتجمع، يعني الحمد لله الكواليس كلها كويسة".
أما عن رأيها في المواهب الشابة المشاركة في المسلسل عبرت عنه ل "الفجر الفني" قائلة: "هما كويسين وحلوين جدًا، بس أنا بقول دائمًا أن الواحد كل ما يقدم في الشغلانة كل ما بينضج اكثر، وده بالنسبالنا كلنا يعني أكيد وإحنا صغيرين كنا كويسين، بس طبعًا كل ما الحياة بتمشي وتعدي بينا بنشوف حاجات في حياتنا، والحاجات دي بنشوفها في حياتنا الشخصية وبنحط منها جزء في شخصياتنا اللي بنقدمها يعني بناخد من كل اللي شوفناه في حياتنا جزء ده بيعمل إثراء للشخصية الفنية، فطبعًا الولاد كلهم حلوين وبأذن الله أكيد قدام هيكونوا أحلي وأحلي".
