سهير جودة: "الجواز زمان كان استقرار ودلوقتي مشروع مش مفهوم!"
طرحت الإعلامية سهير جودة، تساؤلًا عن السبب وراء ارتفاع نسبة الطلاق في المجتمع المصري خلال الفترة الأخيرة، قائلة: "هل احنا مش عارفين معنى الجواز، أم أننا مبنتكلمش في الأمور الجدلية التي تكون محل خلاف من أجل ضرورة إتمام الجواز وخلاص، وبعد الجواز تحصل الخلافات ويبقى في طلاق".
أربع أسس للزواج
وأشارت سهير جودة، خلال حلقة اليوم السبت، من برنامجها "الستات"، المذاع عبر فضائية "النهار"، إلى أن هناك "أربع أمور لا بد ان يتحدث فيها الطرفين قبل الارتباط، وهي؛ الفلوس والحدود الاجتماعية اللي داخل فيها الشكل والخروجات واللبس والأصحاب، وطبيعة الحياة الاجتماعية، وعايزين إعادة تعريف جديدة لمعنى الرجولة، لأن أصبح الرجل بيستمرئ مسؤولية الست المادية على البيت والحياة.. في حين ان الرجولة احتواء بكل المعاني المعنوية والمادية..".
مفهوم الزواج زمان
وأوضحت، أن "المفهوم الطبيعي للجواز زمان، هو استقرار وأمان واحتواء، وأن احنا نعدي مصاعب مع بعض، وفي عشرة وفي حاجات كثيرة جدًا كان بيتعمل حسابها، وكانت مهمة جدًا ووزنها كبير، دلوقتي الناس بتستعرض اكتر، في حاجات كثيرة جدًا بتحصل في الأجيال الجديدة فيها تغير كبير لطبيعة الأفراد داخل الأسرة..".
كلمة الانفصال سهلة
وتابعت: "البنات ليهم مفهوم في قصة الفلوس، وكذلك الولاد، البنت مثلا بتقول انا مستقلة وبشتغل فطبيعي ما احتاجش لحد، طبيعي اني اصرف على نفسي، وجوزها يبقى شايف إنه ا ما دام بتشتغل زيه فهي مسؤولة زيه.. وبمرور الوقت بيكونوا زي اتنين مفيش بينهم مودة.. علاقة ندية جافة وبعدها تبدأ الخلافات.. وبتكون النهاية سهلة وكلمة الانفصال سهلة ".
