ريهام عبد الغفور:  في عام 2022 ربنا كرمني واتعلمت منها إن مفيش حاجة دايمة وبحب أسمع بهاء سلطان

تألقت الفنانة ريهام عبدالغفور في عام 2022 خلال عدة أعمال درامية حققت نجاح كبير الذي تم عرضها على المنصات الإلكترونية،  وفي تصريحات إذاعية 
قالت: "الحمد لله ربنا كرمني السنة دي بزيادة، في ثلاثة مسلسلات وش وضهر ومنعطف خطر والغرفة 207، وكلهم اتصوروا على فترات متباعدة وما كنتش متخيلة إنهم هيتعرضوا ورا بعض ويعملوا النجاح ده"، جاء ذلك خلال مداخلة هاتفية لبرنامج خلاص صحينا تقديم مارينا المصري على ميجا اف ام. 

نجاح ريهام عبدالغفور خارج التوقعات

وأضافت: " كنت قلقانة الأول وخايفة  الناس تزهق لما تشوفني كتير، بس لما المسلسلات اتعرضت ورا بعض بأدوار مختلفة، عملوا رد فعل إيجابي جماهيريا ونقديا بشكل فاق توقعاتي، أنا طول الوقت بشتغل على نفسي إزاي اتغير وأقدم حاجة مختلفة، وكنت واثقة إن دوام الحال من المحال، يمكن لو كان جالى النجاح وأنا أصغر كنت اتعودت عليه وما حسش بقيمته زي دلوقتي، وفهمت ان ممكن يوم واحد يغير كل حاجة".

عام 2022 للفنانة ريهام عبدالغفور 

وعن عام 2022  قالت ريهام عبدالغفور: "عاملة زي الغرفة 207 محدش هيخرج منها زي ما دخلها، وانا خرجت منها بإنى اتعلمت إن مفيش حاجة دايمة، ومفيش ضمانات عشان كده بدعى دايما إن ربنا يغير حالنا للأحسن".

وتابعت: "ومن الشخصيات المهمة اللى خرجت بيها السنة دي هى إني اشتغلت مع مخرجين مهمين كلهم فادونى واتعلمت منهم لأن كل واحد فيهم ليه مدرسته الخاصة، وطلعت كمان بزمايل كتير استمتعت بالعمل معاهم".

الاعمال  المفضلة للفنانة ريهام عبد الغفور

وواصلت:" أما مسلسل "بطلوع الروح" عجبنى جدا جدا، وكنا محتاجين نشوف عالم داعش عن قرب، وأكتر موضوع شاغلنى ونفسي أسلط عليه الضوء هو إننا لازم يكون عندنا رحمة ببعض ونساعد بعض وما نقفش لبعض على الواحدة".

واختتمت قائلة: " أحيانا بتضايق من السوشيال ميديا، بس قررت إن التجاهل مفيد أحيانا، وبحب أسمع بهاء سلطان اوى، وبستمتع بكل أغانيه".

استضافة ريهام عبدالغفور في صاحبة السعادة 

وعلى الصعيد الآخر، حلت الفنانة ريهام عبد الغفور ضيفة على برنامج "صاحبة السعادة"، الذي تقدمه الإعلامية اسعاد يونس على قناة dmc، والتي تحدثت خلالها عن طفولتها وعلاقتها بوالدها.

حيث قالت ريهام عبد الغفور متحدثة عن عدم رغبتها في التمثيل وتشابه مسيرتها مع مسيرة صديقتها الفنانة حنان مطاوع: “والدي مكنش عايزني اشتغل وانا بدرس، انا دخلت تجارة انجلش وبعد كدة طلع في دماغي اني امثل فقالولي اتخرجي عشان كانوا خايفين متخرجش، حنان مطاوع حبيبة قلبي وعشرة عمر، وعندنا نفس الخطة ابهتنا فنانين ومكناش حابين نمثل وابتدينا مع بعض وخطوتنا في نفس الاتجاه، ممكن مش سريعة بس كويسة”.