المعجبات فكروني اسباني ومراتي بتعذرني.. أبرز تصريحات أحمد زعيم مع ياسمين عز

الفجر الفني

أحمد زعيم وياسمين
أحمد زعيم وياسمين عز

تصدر الفنان أحمد زعيم، محركات بحث جوجل في الساعات الماضية،  بعد استضافته مع الإعلامية ياسمين عز  في برنامجها كلام الناس، المذاع عبر شاشة قناة MBC مصر، أمس الجمعة، وتحدث خلال اللقاء عن نجاح أغنيته " يا عراف"، بجانب الحديث عن حياته الشخصية وحقيقة جنسيته، لذلك نستعرض أبرز التصريحات في السطور التالية.

حقيقة جنسية أحمد زعيم 

 

أضاف  " أحمد زعيم" خلال حواره ببرنامج "كلام الناس"،  أن بعض المعجبات اعتقدن أنه اسباني، وأخريات اعتقدن أنه هندي أو عراقي، معقبا: "كنت مبسوط بتشبيهي بمطرب أسباني، وكان بيجيلي أسئلة زي أنت هندي أو أسباني أو عراقي، وكل دي حاجات حلوة علشان وصلت لقلوبهم وكل واحد بيشبهني ببلده".

 

وتابع: "الكلام أسعدني، لأن حتى اللي كان عارفني اتفاجئ بيا، كل دي حاجات حلوة لأن معناها إني وصلت لقلوب الناس، فالشامي فاكرني من عنده، والعراقي فاكرني من عنده، واللي بره فاكرني من عنده، فدي حاجة حلوة".

 

وأشارت ياسمين عز خلال الحلقة  للمطرب أحمد زعيم أنه يشبه إلى حد كبير بطل مسلسل تركي يعرض حاليًا على القنوات الفضائية باسم "فريد".
 

حديث أحمد زعيم عن أسرته 

 

تحدث الفنان أحمد زعيم عن  والدته قائلا: "أمي الله يرحمها، أغلي حاجة عندي راحت، هي توفت في وقت يعني أنا تقريبًا مكنتش بقدملها حاجة، ومع الوقت أما ربنا يكرمني، ويحصل نقلة فنية أو مادية، بفتكرها وبقول ياربي نفسي كانت تكون عايشة وده مايوفيش حقها ". 

 

وأضاف: " أمي قبل ما تتوفى طلبت مني أبعد عن المزيكا، كان السبب عندها علشان الوقت ده مفيش أي حاجة بتجيلي، وكانت بتقولي إنت بتضيع وقت ونفسك، ولكن كنت عارف هي نيتها إيه".

 

كما تحدث أحمد زعيم عن زوجته قائلًا: "مراتي بتعذرني كتير عشان هي طيبة وحصل مشاكل كتير بسبب المعجبات وده شيء طبيعي، ومتوقع قدام يحصل كتير وبقولها ده شعاع جاي من بعيد وإنتي لازم تستعدي، ولو نفسيتك وحشة بتأثر عليا وعلى البيت". 

 

وعن دخول  ابنته الوسط الفني قال:  " بنتي عندها ماشاء الله التيمبو حلو، ومن وجهه نظري هيبقى صوتها حلوة أوي، في فترة الطفولة ممكن تغني ولكن أول ما تكبر هخاف عليها، أنا كراجل شوفت كتير ما بالك من البنت، حتى المطربات الموجودين على الساحة حصلهم مشاكل وضغوطات كتير".